Amaphoyisa ahlakaze umbhikisho eMandawe
UHLAKAZWE ngamaphoyisa umbhikisho wabantu ababalelwa ku-1 500 eMandawe izolo ekuseni akade bevale umgwaqo ngamathayi avuthayo, amatshe nezingodo.
Amaphoyi aseScottburgh nalawo abhekelele udlame emphakathini asebenze kanzima ukuhlakaza imashi yabantu akade bemashela izidingo beqonde emahhovisi kaMasipala aseScottburgh.
UColonel Thembeka Mbele, wamaphoyisa KwaZulu-Natal, uthe abantu akade bemasha bebenodlame bevimbela umphakathi endleleni yawo. “Amaphoyisa abejutshwe ukuqapha isimo emgwaqweni u-R102 eScottburgh ahlakazile isixuku ebesinodlame. Besifike sihlakazwe sisuke phambi kwamaphoyisa bese siyobhikisha kwenye indawo. Besinqamula izihlahla namagatsha sivale umgwaqo ,” kusho uColonel Mbele.
Uthe kuke kwaphazamiseka ukuhamba kwezimoto emgwaqweni waseScottburgh. Amaphoyisa aphenya amacala okuphehla udlame emphakathini nowokulimaza impahla.
Uthe bathole ukuthi umphakathi waseMandawe wathumela uhlu lwezikhalo kumasipala ngoMeyi 30 kodwa wanganama ngezimpendulo owazithola.
Ube usukhetha ukuvala imigwaqo ukuze uzwakalise ilaka lawo.
Uthe bawu-43 abantu ababoshiwe babekwa amacala okudala udlame emphakathini. Bavele enkantolo namhlanje.
Baphinde bavimba umgwaqo ngegobongo lebhasi elingasahambi, imoto neloli likadoti eMagcino.
Amaphoyisa ayaqhubeka nokuqapha isimo ukuqinisekisa ukuthi umgwaqo ungaphinde uvalwe.