Baboshwe ngelokweba umshini
KUBOSHWE amadoda amabili asolwa ngokuntshontsha umshini wokumbambatha itiyela kwathi esebalekela amaphoyisa, abewajaha ashayisa imoto yowesifazane obezihambela, eGreyville izolo.
Laba basolwa kuthiwa bajahwe amaphoyisa omgwaqo akwaMasipala weTheku ngabo-12 emini, emuva kokubizwa osonkontileka abantshontshelwe umshini, abaqale bajaha abasolwa ngezinyawo. Laba basolwa kuthiwa bakwazile ukushiya labo sonkontileka ngoba bebehamba ngemoto iKia Picanto ebomvu okuvele ukuthi bebeyiqashile.
Umthombo weSolezwe obusendaweni yesigameko kodwa ongathandanga ukudalulwa uveze ukuthi laba basolwa bagile lo mhlola emgwaqweni ongasenxanxatheleni yezitolo iWindermere lapho bekukade kusebenza khona osonkontileka, bavele baqukula umshini bawufaka emotweni base beyisusa ngesivinini esiphezulu.
“Ngesikhathi laba basolwa bebaleka emuva kokweba lo mshini bebehamba ngesivinini esiphezulu bagcina beshayise imoto iChevrolet emhlophe ohlangothini lwangakwesobunxele,” kusho umthombo.
Isolezwe lithole ukuthi umnikazi weChevrolet usukile endaweni yesehlo waya kovula icala esiteshini samaphoyisa eBerea. Abasolwa kuthiwa bebephethe izinto zokujema izimoto. Umshini abebewebile kuthiwa ungabiza phakathi kukaR10 000 kuya kuR15 000.
Ngesikhathi Isolezwe lifika endaweni yesehlo abasolwa ababili bebelele phansi sebefakwe ozankosi. Umshini okuthiwa bebewebile ubusebhuthini lemoto. Kule ndawo bese kunesixuku sabantu abesibuka.
Okhulumela amaphoyisa KwaZulu-Natal, uColonel Thembeka Mbele, uthe amaphoyisa abophe abasolwa ababili abaneminyaka engu-33, abatholwe nempahla yokwebiwa.
“Amaphoyisa abambe abasolwa ababili emgwaqweni uLilian Ngoyi, bazovela eNkantolo yeMantshi maduze.”