I-DA kwabavulele uJuju awokucwasa
ZIYANDA izinhlangano ezivulela umholi we-EFF, uMnuz Julius Malema, amacala okucwasa emuva kwenkulumo yakhe yangoJuni 16 lapho ethe iningi lamaNdiya alibafuni licwasa abamnyama.
EThekwini, uMalema uvulelwe yiSouth African Minority Rights Equality Movement (Samrem) icala lokucwasa.
Izolo umholi wentsha yeDA, uMnuz Luyolo Mphithi, uthe babhalele iSouth African Human Rights Commission (SAHRC) bethi ayiphenye uMalema ngokubiza amaNdiya ngabantu abacwasayo nePhini lakhe uMnuz Floyd Shivambu.
Ekhuluma nentsha eKlerksdorp, eNorth West, uMalema wathi: “Iningi lamaNdiya liyacwasa futhi akufanele sisabe ukukusho lokhu. Angisho ukuthi wonke ayacwasa kodwa iningi lawo. Yinto efanayo nakubafowethu bamaKhaladi.”
UMphithi uthe uShivambu bamvulele icala ngokuthi iPhini likaMqondisi Jikelele loMnyango wezeziMali, uMnuz Ismail Momoniat, libathatha kancane abantu abamnyama futhi alinandaba noMqondisi Jikelele noNgqongqoshe wezeziMali.
“Uzithathela izinqumo futhi uhlale eza yedwa la ePhalamende. Uzitshela ukuthi ungcono,” kusho uShivambu.
UMphithi uthe udaba balubike kwiSAHRC ngoba abafuni kube khona abaholi abazitshela ukuthi umthetho awusebenzi kubona.
“Akekho umuntu waseNingizimu Afrika okufanele ahlanjalazwe noma ehliswe isithunzi. I-EFF kufanele ikuqonde ukuthi eNingizimu Afrika siyizwe elinezinhlanga ezihlukene ngakho kufanele sihloniphane sonke. Siyathemba iSAHRC izobheka izikhalo zethu bese isukumela phezulu ize nendlela yokulungisa isimo kubaholi be-EFF,” kusho uMphithi.