I-Eskom izonyusa amaholo ngo-4.7% nonyaka
INKAMPANI ephehla ugesi eNingizimu Afrika, i-Eskom iphakamise ukuthi izokwazi ukunyusa amaholo ngo-4.7% kulo nyaka emuva kokuthi abasebenzi bezinyunyana ezintathu bebhikishile ngesonto elidlule.
Izingxoxo zifinyelele kwangqingetshe ngeledlule emuva kokuthi abakwaEskom bethe abanayo imali yokuwanyusa babeka u-0% etafuleni. Abakwa-Eskom bamemezele lezi zindaba izolo emuva komhlangano abebenawo nezinyunyana ezintathu okuyiNational Union of Mineworkers (NUM), National Union of Metalworkers of South Africa (Numsa) neSolidarity.
UMnuz Livhuwani Mammburu obhekelele ezokuxhumana kwiNUM, uthe izinyunyana zizobuyela kubasebenzi nesiphakamiso esisha sika-Eskom ukuze zizwe ngabo ukuthi bayasamukela noma cha. “Inkampani i-Eskom ithembisa ukunyusa amaholo ngo-4.7% kulo nyaka kanti ifuna isivumelwano seminyaka emine. Kule minyaka emithathu ezayo abasazisanga ukuthi bazowanyusa ngamalini amaholo kodwa bathe azohambisana namandla emali.”
Uthe izingxoxo zamaholo ziyaqhubeka namhlanje futhi izinyunyana zizobe sezazi ukuthi abasebenzi badingani.
Khonamanjalo, i-Eskom igqugquzele abantu ukuthi bawusebenzise kahle ugesi ngoba ungase unqanyulwe ngokwesigaba sokuqala. Ithe kuzothatha izinsuku ezingu-10 ukuthi isimo sibuyele kwesijwayelekile emuva kwesiteleka sabasebenzi.
EThekwini, umasipala ugqugquzele abantu ukuthi bangene kwi-website ethi www. durban.gov.za bathole ukuthi ugesi uzonqamuka nini lapho behlala khona.