Bakhala ngamathoyilethe angasebenzi erenke
BASEBENZISA ithoyilethe elilodwa osomatekisi nabagibeli besilisa erenke yamatekisi amabanga amade eseDurban Station, eThekwini.
Omunye umgibeli uveze ukuthi amathoyilethe selokhu aba nenkinga ngoNovemba kanti yize beyibikile inkinga yawo kodwa uMasipala weTheku akenzi lutho.
Umgibeli ojwayele ukugibela amatekisi aya eFilidi kule renke kodwa ongathandanga ukudalulwa, uthe bakhathazekile ukuthi iMeya yeTheku uNkk Zandile Gumede, uvela emaphepheni ethi ufuna ukukhuculula idolobha kodwa abasebenzi bakhe bahlulwa ukulungisa inkinga yezindlu zangasese.
“Sibonile ukuthi iMeya ifuna ukukhuculula iTheku ize yagqugquzela nabadayisi basemgwaqweni ukuthi kufanele babe namaphemithi. Sikhathazekile thina la esiteshini ngoba abagibeli nosomatekisi besilisa basebenzisa ithoyilethe elilodwa ukuzikhulula amanye selokhu agcwala ngoNovemba. Abesifazane basebenzisa amathoyilethe ayisithupha, amane awasebenzi,” kusho umgibeli.
Uthe okubakhathaza kakhulu wukuthi kuzoba nabantu abaningi erenke njengoba kuzovalwa izikole okusho ukuthi bazodinga izindlu zangasese.
“Sikhathazekile njengoba kuzovalwa izikole kwande nesibalo sabagibeli abaya ezindaweni ezihlukene. Siyacela umasipala alusukumele udaba. NgoLwesibili sibe nomhlangano ngalolu daba sabona kungcono ukuthi silufake ephepheni ngoba umasipala kade wawuthembisa ukulusukumela kodwa ungenzi lutho,” kusho umgibeli.
UMnuz Mandla Nsele, oyiNhloko yezokuXhumana esabambile kuMasipala weTheku, uthe bayalwazi udaba lwamathoyilethe osekuphele izinyanga ezithathu engasebenzi ngenxa yokugcwala kwesitamkoko. “Inkinga yokungahambi kahle kwendle inezinyanga ezintathu ikhona. Umasipala uthumele oplumber abahlukene ukuthi bayilungise kodwa ngenxa yokuthi amapayipi athutha indle nezitamkoko zakuleya ndawo zindala imizamo yethu ayikakatheli izithelo ezinhle. Isixazululo wukuthi kufakwe amapayipi amasha, kulungiswe izitamkoko ezindala,” kusho uNsele.
Uthe uhlelo lokuqoka osonkontileka abazolungisa inkinga yamathoyilethe asesiteshini seluqalile futhi balindele ukuthi luphele ezinsukwini ezingu-14.
Uthe abasebenzi bakwaMasipala weTheku bebenomhlangano nezinhlaka ezithintekayo erenke ukuzichazela ukuthi luzolungiswa kanjani lolu daba nokuthi kuzokwenzekani ngesikhathi kusenziwa imizamo yokuthola isixazululo.