ITheku liyaziqhenya ngolwamathenda
IZIKHULU zoMkhandlu weTheku zizishaya isifuba ngokuthi zikwazile ukwehlisa imali yamathenda aphume kungazange kulandelwe imigudu yaba nguR48 million kwisabelomali salo nyaka isuka kaR530 million wangonyaka odlule.
Emhlanganweni wamakhansela alawula umkhandlu eCity Hall izolo, iMeya yoMkhandlu weTheku uNkk Zandile Gumede ichaze ukwehla kwemali ephume kungalandelwanga imigudu njengempumelelo enkulu emkhandlwini. “Nakuba ikhona imali ephume kungalandelwanga imigudu kodwa incane kakhulu uma iqhathaniswa nemali ephume kwisabelomali esidlule, ukwehla kukhombisa ukuthi umkhandlu usezandleni ezikahle.”
Uncome iMenenja yoMkhandlu uMnuz Sipho Nzuza wathi imisebenzi yayo nolwazi lwayo olunzulu kwezezimali olwenze bafika kulesi sigaba.
UNzuza uthe uzoqhubeka nokubheka ngeso lokhozi izinto ukwenza isiqiniseko sokuthi incipha kakhulu imali ephuma ngemisebenzi ekhishwa kungazange kulandelwe imigudu.
UMgcinimafa eMkhandlwini weTheku uMnuz Krish Kumar uthe okunye okubajabulisayo ukuthi nakuba imisebenzi isuke iphume ingazange ilandelwe imigudu kodwa osonkontileka abasuke bebaqashile bashaya umsebenzi osezingeni eliphezulu. Ikhansela leDA uMnuz Heinz de Boer lithe isizathu esenza ukuthi kuqhubeke ukukhishwa kwemisebenzi ngendlela engafanele ukuthi abantu abenza lowo mkhuba abathathelwa izinyathelo. “Izophela nya lento uma bangajeziswa abantu abagangayo, manje iyaqhubeka ngoba bayazi ukuthi ngeke baze benziwe lutho,” kusho ude Boer. Nomholi wekhokhasi ye-IFP emkhandlwini uMnuz Mdu Nkosi uthe kusazolokhu kuqhubeke njalo ukuphuma kwemisebenzi ngaphandle kokulandelwa kwemigudu ngoba akuthathelwa muntu izinyathelo. “Unyaka nonyaka sihlale sikhuluma into eyodwa kodwa alukho ushintsho,” kusho uNkosi. Umholi wekhokhasi yeDA uNkk Nicole Graham uthe nakuba bekushayela ihlombe ukwehla okukhona kodwa mkhulu umsebenzi okusamele wenziwe. “Kumele sifike esigabeni lapho kungeke kube khona musebenzi nowodwa okhishwe ngendlela engafanele siwumkhandlu,” kusho uNkk Graham.