Ufuna incazelo ngokwenzeke enkampanini iLiberty
UMLAWULI wokusatshalaliswa kolwazi (Information Regulator), uNkk Pantsy Tlakula, uzwakalise ukukhathazeka ngokwebiwa kwemininingwane yamakhasimende enkampani yezimali iLiberty.
Esitatimendeni uNkk Tlakula uthe ubhalele isikhulu sakwaLiberty, uMnuz David Munro ecela ukuthi bahlangane ukuze acacise ukuthi kufohlwe kanjani kwingqalasizinda yale nkampani.
UMunro uthe banqabile ukukhokhela amasela imali abeyifunile futhi bayaqhubeka nophenyo ukuze bathole ukuthi afohle kanjani ebuchwephesheni babo.
Uqinise amakhasimende abo idolo ngokuthi imininingwane yawo iphephile ngoba bazoziqinisa ngokudlulele ezokuphepha.
UNkk Tlakula uthe ufuna ukwazi ukuthi kuntshontshwe imininingwane enjani, abakwaLiberty bebenaziphi izinhlelo zokuvikela ukufohla kwezigebengu ezeba imininingwane kwingqalasizinda yobuchwepheshe nokuthi yikuphi osekwenziwe ukuvikela abantu.
“Yize umthetho iProtection of Personal Information ungakasebenzi ngokuphelele kodwa ngiyazigqugquzela izinkampani ukuthi zivikele imininingwane yabantu.
“Kufanele zenze konke okusemandleni ukuvikela imininingwane yabantu zivike ngawo wonke amandla azo ukuthi amasela angafohli kwingqalasizinda,” kusho uNkk Tlakula.
Uthe kunamasela afohle kwingqalasizinda yeMasterdeeds, Facebook neyeViewFine njengoba sekufohlwe kweyaseLiberty Holdings.
“Ngicela uhulumeni nezinhlaka zomthetho ukuthi zilusukumele lolu daba lokufohla kwingqalasizinda yezinkampani ezihlukene ngoba imininingwane yabantu kufanele iphephe.
“Akufanele kube khona amasela aqhosha ngokuthi aseyitholile imininingwane yabantu aze acele nokukhokhelwa ukuze angayidedeli,” kusho uNkk Tlakula.
Uthe uzokwenza isiqinisekiso sokuthi imininingwane yabantu iyavikelwa.