Ithenda yokuphekela izikole eKZN
BAZOQALA ngonyaka ozayo osonkontileka abasha abazophakela izikole KwaZuluNatal njengoba ithenda kulindeleke ukuthi ikhangiswe ngasekupheleni konyaka.
Ngokwezinhlelo zomnyango sizokwanda isibalo sabafundi abazophakelwa njengoba sezingu-5 281 izikole eziphakayo, zinyuke ngo-51.
Kanjalo nesibalo sabafundi abazohlomula sizonyuka ngabafundi abangu-36 300, sifinyelele ngaphezulu kuka-2 million.
Umbiko womnyango othulwe esiShayamthetho uveza ukuthi sizokwanda ngosonkontileka abangu-33 isibalo sabazophakela izikole.
Okhulumela uMnyango, uMnuz Sihle Mlotshwa, uthe bazokhangisa ithenda ngoNovemba wathi abaphakayo abasha bazoqala ngonyaka ozayo.
Lokhu kulandela isinqumo sokuthi kuchithwe uhlelo lwabaphakayo abase beqokwe ngumnyango kulandela icala elafakwa ababekhala ngokuthi uhlelo aluhambanga ngendlela.
“Okwamanje ngeke ngikwazi ukuqinisekisa ukuthi bazoqala ngayiphi inyanga kodwa abasha bazoqala ngonyaka ozayo. Sizoyikhangisa ithenda ngoNovemba nonyaka,” kusho uMlotshwa.
Umbiko womnyango uveza ukuthi lolu hlelo lwakha amathuba omsebenzi kwabaphekayo abangu-12 617, abaphakela abafundi abangaphezulu kuka-1.4 million basezikoleni zamabanga aphansi ezingoQuintile 1 kuya ku-3, abangaphezulu kuka-726 000 basemazingeni aphezulu ezikoleni ezinguQuintile 1 kuya ku-3 (izikole okufundwa mahhala).
Bangu-141 289 abafundi bakuQuintile 4 no-5 basemazingeni aphansi abahlomulayo, babe ngu-2877 basezikoleni zamabanga aphezulu ezingoQuintile 4 no-5 abahlomulayo.
Bangu-14 366 abahlomulayo abafundi ezikoleni zezingane eziphila nokukhubazeka.
Abaphekayo bakhokhelwa uR1 089 ngenyanga.
UNgqongqoshe walo Mnyango, uMnuz Mthandeni Dlungwane, watshela Isolezwe ukuthi ngeke besakhokhelwa ngemuva kwesikhathi abaphakayo njengoba benohlelo lokuthi babakhokhele ngendlela.
Lolu hlelo lufaka ukuqeqeshwa kothishanhloko ukuthi babhekele nabaphakayo.
Kuzobunjwa ithimba elihlanganisa zonke izinhlaka ohlelweni lwezokuphakelwa kwabafundi ukuze kwesekwe izifunda. Nyakenye kube nezikhalo abanye abaphakela izikole baduba ukuphaka ngoba umnyango ungakhokhile.
Osonkontileka babekhala ngokuthi umnyango uyabawisa njengoba ungabakhokheli kuze kuphele izinyanga ekubeni kulindeleke ukuthi baqhubeke baphake baphinde bakhokhele abaphekayo phezu kokuba imali bengayitholile emnyangweni.