I-Andropause idlondlobala kwabano-55
KUSENZIMA kwabesilisa ukukhuluma ngokufika kwabo esikhathini sokuphelelwa inzalo nemizwa yocansi, abaningi babona lokho kuwukuphela kobudoda babo.
Ucwaningo lwakamumva olwenziwe nguMnuz Patrick Holford ongumcwaningi ophinde abe yiNutritionist, luveze ukuthi baningi abesilisa abasenkingeni yokuficwa yi-Andropause ngokushesha kodwa abasabayo ukukhuluma ngayo.
UHolford uthe yize lesi sigaba sifica bonke abesilisa, indlela yokudla ingasiza ekutheni singasheshi sifike. Uthe izimpawu ezijwayelekile ze-Andropause kubalwa ukwehla komdlandla wocansi nokungavukelwa, ikakhulukazi ngezikhathi zasekuseni.
Ezinye izimpawu ubale ingcindezi, ukucasuka nokukhohlwa.
“Izimpawu zomzimba ezihlobene ne-Andropause ziyafana nezabesifazane, okubalwa ukuqaqamba kwamalunga omzimba, isikhumba esomile, ukujuluka ngezikhathi ezithile ebusuku nokungazizwa kahle emzimbeni. I-Andropause ivamise ukudlondlobala kwabesilisa abaneminyaka engu-55.”
Uveza ukuthi izinto ezithikameza umphefumulo zinawo umthelela ekutheni owesilisa asheshe afike kulesi sigaba. Ukuphelelwa umsebenzi, ukushonelwa nokungaphumuli, kungezinye zezinto okuthiwa zibhebhezela i-Andropause. Ukukhuluphala ngokweqile nakho kuyayidala i-Andropause ngokushesha.
UHalford uncoma ukushintsha indlela yokudla kwabesilisa ukugwema ukufikelwa ilesi sigaba ngokushesha. Ukhuthaza ukuthi badle kakhulu ukudla okunama-protein ukuze kukhuphuke izinga leTestestorone emzimbeni. Uthe ama-protein aphinde anciphise ukukhiqizeka kwamahomoni abulala umdlandla wocansi. Uthe kumele bagweme isinkwa esimhlophe, i-pasta nelayisi elimhlophe.
Uthe ukudla imifino nezithelo ezinemibala egqamile nokugwema kakhulu inyama ebomvu kungasiza ukwehlisa i-Andropause.
Kudingeka namafutha aphuma kufishi namakinathi ukuze kwakhekhe isidoda esiqinile.
UHolford uncoma nokudla okuneZinc etholakala kushokoledi onsundu, ku-garlic nakwimbewu yethanga. Njengoba uJuni kuyinyanga ekhuthaza nokunakelela ezempilo kwabesilisa, uHolford uthe kubalulekile ukuthi bajwayele ukubonana nodokotela.