Ukudla kuxoxa indaba ngesiko
BAZOKHONJISWA ubuhle beTheku nokudla kwalo abazohambela umbukiso i-ECR House and Garden Show oqala ngoJuni 29 e-Exhibition Centre.
UKhutso Masethe ongumpheki ozimele, ongumnikazi wendawo yokudla iDurb n’ Burger Co, ungomunye wabazoba yingxenye yalo mbukiso odonsa abaningi minyaka yonke. UMasethe utshele Isolezwe ukuthi uzokhombisa abantu ngezindlela ezahlukene zokwenza ukuthi ukudla kuhehe. Uthe iTheku linenhlanhla yokuthi kuhlala abantu abahlukene, okwenza nokudla kwakhona kukhombise amasiko anhlobonhlobo.
“Ukudla kuyinto ebalulekile, kungakwazi ngisho ukubuyisa ithemba ezinhlizweni zabantu. Isiko libonakala kahle ngokudla, yingakho kumele sikujabulele,” kusho yena.
UMasethe owaziwa ngokudla okubizwa ngeStreet Food okubalwa ama-burger, uthe kade ayefisa ukucobelela abantu ngezindlela zokudla kodwa engenayo indawo yokukwenza lokho. Uthe wabona kungcono akwenze lokhu ngokuhambela izindawo zokukhangisa ukudla nemicimbi ehlukene.Yize abaningi bazi ukuthi ama-burger ayingxenye yokudla okungenayo impilo, uMasethe uthe akunjalo.
“Abangaziyo bayazi ukuthi ngijwayele ukwenza ama-burger kodwa ngaphambi kokwenza noma yini ngiyayicabangela nempilo. Ngiyazibuza ukuthi ingabe ngifuna ukudala ezinye izinkinga noma ukuba yisixazululo emphakathini. Ngokubona kwami konke ukudla kungaba yingozi empilweni yomuntu, kuya ngokuthi kwenziwe kanjani,” kusho yena.
Ugcizelela ukuthi kukho konke ukudla kunendaba exoxwayo ikakhulukazi ngesiko laloyo okuphekile. Edalula amanye amathiphu okupheka, uthe ufunde ukuthi akubalulekile ukuthi unezithako ezingakanani ukuze ukudla kube mnandi.
Uthe ungahlanganisa noma yini onayo kuphuma ulozolo lokudla. Kulo mcimbi weHouse and Garden Show (HGS) ophela ngoJulayi 8, uMasethe uzokhombisa izidlo azithandayo ezingathakaselwa yiwo wonke umuntu.
Abahleli balo mcimbi bathi bazobhema bakholwe abazowuhambela. Kulindeleke kukhangiswe ngezimpahla zasendlini nezasengadini. Kulo nyaka kukhuthazwa ukuthi abantu basebenzise noma yini abanayo ukwenza ikhaya liqhakaze, yingakho bezokhonjiswa ngezindlela eziningi zokukwenza lokho.
UNkk Cairey Baxter-Bruce onguMqondisi weHGS, uthe njengoba izinga lobuchwepheshe likhula, kuyadingeka zishintshe nezindlela zokuhlobisa ikhaya. Uthe bazokhombisa ukuthi ungasebenzisa ngisho ifenisha endala ukuyenza ibukeke kabusha.