OweMorocco akatatazeliswa uCristiano ‘CR7’ Ronaldo
ISALELWE imidlalo emibili enzima iMorocco eshaye into ephansi ithelwa othulini i-Iran emdlalweni wayo wokuqala kwiNdebe yoMhlaba, eSt. Petersburg ngeledlule.
EzikaHerve Renard zishaywe ngo 1-0 yi-Iran ngegoli okwaba umkhonto ogwaza ekhaya ngomzuzu ka-90, ngesikhathi u-Aziz Bouhaddouz elishaya enza iphutha. I-Iran icijwa nguCarlos Quieroz oke wacija iBafana Bafana eminyakeni edlule.
Lo mphumela ufake i-Atlas Lions enkingeni kuGroup B, njengoba sekusele amaqembu amabili abhekwe ngabomvu ukuba adlulele kuLast 16.
Lawo maqembu iSpain enqobe iNdebe yoMhlaba ngo-2010 eNingizimu Afrika nePortugal enqobe isicoco se-Euro ka-2016.
IMorocco esekugcineni kuGroup B, izobhekana nePortugal namuhla ngo-2 ntambama. Ziya kulo mdlalo nje, iPortugal isanda kubambana neSpain ngo 3-3 emdlalweni wokuvula ngeledlule, eSochi eRussia.
Wonke amagoli ePortugal avalelwe phakathi uCristiano “CR7” Ronaldo. Lesi sihlabani esigijimela iReal Madrid, eSpain, sinqeqeleza phambili ngamagoli, silandelwa uDiego Costa oseshaye amabili kwiSpain noRomelu Lukaku waseBelgium naye osashaye amabili.
URonaldo uqophe umlando eba ngumdlali wesine ukushaya amagoli amathathu emiqhudelwaneni yeNdebe yoMhlaba eyehlukene. Abanye abake benza lokhu uPele waseBrazil, uMiroslav Klose no-Uwer Seeler baseGermany.
Akubuzwa ukuthi mkhulu umsebenzi ohlalele iMorocco ekutheni ivimbe uRonaldo ovutha engabaselwe.
Isitobha seMorocco uFaycal Fajr sithe akuyona neze into enzima ukuvimba uRonaldo ukuthi angashayi goli kulo mdlalo. UFajr usemabhukwini eGetafe, yaseSpain.
Lesi sitobha siyavuma ukuthi uRonaldo ushelela okommese usika ibhotela kodwa sithe akalona iqatha elingababinda.
“Ngidlale noRonaldo kwiLa Liga iminyaka emithathu kuya kwemine. Angikuphiki ukuthi ungumdlali osezingeni eliphezulu kodwa singamvalela ekopini ngokuthi simake kahle. Sinabadlali abahle njengoba nayo iPortugal inokhilimu babadlali. Kuyasithokozisa njengeMorocco ukuthi sinolwazi ngoRonaldo njengoba no-Achraf Hakimi edlala naye kwiReal Madrid, ngakho sinolwazi lonke esiludingayo ngaye,” kusho uFarj etshela abakwaFox Sport.
Umdlalo olandelayo iMorocco ezowudlala kuGroup B, kuzoba ngowokugcina nalapho izotholana khona neSpain ngoJuni 25.
Imidlalo yeNdebe yoMhlaba ku-SS3 namuhla: Portugal v Morocco (2pm); Uruguay v Saudi Arabia (5pm); Iran v Spain (8pm)