Siphuma kusasa esabazobhala u-matric

Isolezwe - - IZINDABA - MHLENGI SHANGASE

KUZOCACA kusasa ngesibalo sabafundi abazobhala u-matric KwaZulu-Natal kulo nyaka njengoba okwamanje isibalo sime kwabangaphezulu kuka-147 000.

Lokhu kuvezwe nguDkt Barney Mthembu, inhloko yezivivinyo otshele Isolezwe ukuthi kusasa zizobe sezaziwa izibalo zokugcina zabazobhala.

UMthembu uthe minyaka yonke siyanda isibalo sabafundi ababhala leli banga.

“Okwamanje bangu-147 210 abafundi abazobhala kodwa isibalo sokugcina sizosithola ngoLwesihlanu. Sizobe sesikwazi ukusho ukuthi bangaki abazobhala kulo nyaka,” kusho uMthembu.

Kuzokhumbuleka ukuthi lesi sifundazwe yisona esinesibalo esikhulu sabafundi ababhala u-matric.

Ezinye izifundazwe ezinesibalo esikhulu sababhalayo kuba yiGauteng ne-Eastern Cape.

UMthembu ubalule ukuthi kulo nyaka abafundi bazobhala u-matric ohlukene kabili.

Uthe kukhona abazobhala u-matric obizwa nge-academic onezifundo ezijwayelekile bese kuba khona abazobhala onezifundo zamakhono.

“Kuzobhalwa amaqoqo amabili, ababhala i-academic nababhala i-technical okokuqala ngqa kulo nyaka. I-technical ifaka izifundo ezehlukene okubalwa iTechnical Maths neSayensi,” kusho uMthembu.

Uthe njengoba bekufundwa kudingeka baqinise kakhulu kwiTechnical Maths ngoba abafundi basasilele emuva njengoba imiphumela itshengisa ukuthi ime ku-41%.

I-Technical Science yona akufani ngoba ingaphezulu kuka60%. Mayelana nokufunda ngamaholidi uMthembu uthe kuhambe kahle wathi kwezinye izikhungo bekusafundwa.

Uthe nomqondisi jikelele womnyango kuzwelonke, uMnuz Mathanzima Mweli, uvakashele kulesi sifundazwe ezobheka njengoba bekufundwa.

“Kuhambe kahle ngoba kwezinye izindawo, njengaseMlaza nje, iMenzi High ibizifundela. Kwezinye izindawo abafundi besibahlanganisile kanti kwezinye bebezifundela,” kusho uMthembu.

Newspapers in Zulu

Newspapers from South Africa

© PressReader. All rights reserved.