Umholi uqinisa idolo abalandeli beNFP

Isolezwe - - IZINDABA - MLUNGISI GUMEDE

I-NFP KwaZulu-Natal isiqale umkhankaso wokuvuselela amagatsha ayo njengoba ilungiselela ukhetho lukazwelonke olubhekwe ngabomvu lwangonyaka ozayo.

USihlalo weNFP KwaZulu-Natal, uMnuz Vikizitha Mlotshwa, unxuse amalungu eqembu ukuba angavumi ukudidiseka ngemuva kokwethulwa ngokusemthethweni kweqembu elisha elihlubuke kubona iNational Peoples Front (NAPF).

INAPF yethulwe ngokusemthethweni emcimbini obuseGoli ngempelasonto edlule.

“Ngifuna ukuqinisa abalandeli bethu idolo, ngibatshele ukuthi iNFP isakhona futhi izolungenela ukhetho lwangonyaka ozayo,” kusho uMlotshwa.

Uthe uyazi ukuthi abanye abalandeli babo bangadidiseka, bajoyine amanye amaqembu ngemuva kokwehluleka ukungenela ukhetho lohulumeni basekhaya ngo-2016.

“INFP inayo imali, nango-2016 yayinayo imali yokungenela ukhetho kodwa abantu abathile bakhetha ukuthi bangalifaki iqembu okhethweni ngenxa yezinhloso zabo,” kusho uMlotshwa.

Uthe sebeqale umkhankaso wokuvuselela amagatsha abo njengoba belungiselela ukhetho lwangonyaka ozayo.

“Kule mpelasonto esiya kuyona sizoba nombuthano eSweetwaters eMsunduzi kuthi ngempelasonto ezayo sibe seSikhaleni lapho sizobe sihlangene, sibhunga ngezinhlelo zeqembu,” kusho uMlotshwa.

Uthe alikho iqembu lezombusazwe elake laphumelela ukhetho ngaphandle kokuba namagatsha aqinile.

“Sizimisele ngokuthi sibe namagatsha kuwona wonke ama-ward njengoba sisemkhankasweni wokuvuselela iqembu lethu,” kusho uMlotshwa.

Uthe kumele baziqhenye ngokuthi iqembu labo lisakhona ngemuva kokungalungeneli ukhetho ngo-2016.

“Amaqembu amaningi anezinkinga ezinkulu ezedlula ezethu, amanye kuwona kuyabulawana, amanye ahluleke ukuhlalisa izingqungquthela,” kusho uMlotshwa. Uphonsele inselelo umholi weNAPF, uMnuz Bheki Gumbi, ukuba abuyele ekhaya.

“Ngifisa ukumxwayisa uGumbi ngokuthi leli qembu alisungulayo ngeke lize lisimane, noMntwana uMzonjana Zulu owaphuma kuthina wasungula i-Academic Congress Union ngamkhuza njengoba namanje ngenza kuGumbi,” kusho yena.

Uthe amaqembu asungulwa ngabantu abasuke kukhona izinto abanganeme ngazo awavamisile ukuphumelela.

“Simbonile noDkt Makhosi Khoza obeku-ANC esungula iqembu lakhe. Livele laphela lingakaze lisimame,” kusho uMlotshwa. Ethintwa uGumbi, uthe akaziboni ebuyele kwiNFP njengoba manje esenakhaya elisha.

“Siyathemba ukuthi iqembu lethu lizosimama, ube yimpumelelo nomcimbi wokwethulwa kwalo,” kusho uGumbi.

Newspapers in Zulu

Newspapers from South Africa

© PressReader. All rights reserved.