UMeyiwa usethembe Isilo ngolukaSenzo
UYISE kaSenzo Meyiwa owayengunozinti weBafana Bafana ne-Orlando Pirates, uMnuz Sam Meyiwa ushaya phansi ngonyawo uthi ngeke livalwe idokodo lecala lokubulawa kwendodana yakhe esaphila.
Ekhuluma neSolezwe izolo ngemuva kombiko wephepha langeSonto obuthi idokodo lecala likaSenzo selivaliwe, uMeyiwa uchaze lo mbiko njengembudane ezomnyusela ushukela.
“UNgqongqoshe wamaPhoyisa uMnuz Bheki Cele kade nginaye emqhudelwaneni kaSenzo obuseMlaza wangitshela ukuthi udaba basalulandela. Wangithembisa nokuthi uzohlale engibikela ukuthi kuqhubekani,” kusho uMeyiwa.
Uthe amaphoyisa abengeke avale icala lendodana yakhe engambikelanga.
UMeyiwa uthe usehlela ukuyobikela Isilo samaBandla uGoodwill Zwelithini ngodaba lukaSenzo nokungakhokhelwa kwakhe yi-Orlando Pirates imali yendodana yakhe.
“Sengicabange kahle ngizohamba ngiyozilahla kwiMbube ngiyicele ukuthi ayingenelele kulolu daba ngoba sekudlalwe ngami kakhulu, Isilo sekuyithemba lami lokugcina njengoba kuyisona ubaba wami walapha emhlabeni,” kusho uMeyiwa.
Uthe ngeke aze aphumule bungakenzeki ubulungiswa ngokubulawa kukaSenzo.
USenzo wabulawa ngo-Okthoba 2014, manje sekuphele iminyaka emine abulawa kodwa akuboshwa muntu.
“Sebengamane babulale mina ngoba vele noNkulunkulu sengamcela ukuthi awamukele umphefumulo wami uma kwenzeka ngibulawa,” kusho uMeyiwa.
Okhulumela amaphoyisa kuzwelonke uBrigadier Vishnu Naidoo ukuchithile ukuthi icala likaSenzo selivaliwe wathi lisekhona.
“Udaba lusaphenywa, inkinga wukuthi okwamanje abukho ubufakazi obusha,” kusho uNaidoo.
Ebuzwa ukuthi kungani leli cala selisusiswe futhi kumaHawks labuyiselwa kwiSAPS, uthe alikho iphutha kulokho ngoba zombili lezi zinhlaka ziyakwazi ukuphenya amacala okubulala.
Imizamo yokuthola uMntwana uThulani Zulu ayiphumelelanga, ucingo lwakhe beluvaliwe kwaze kwashaya isikhathi sokushicilela.