UMchunu ungenelele kolwaseRBM
SEKUNGENELELE uNdunankulu waKwaZulu-Natal, uMnuz Willies Mchunu odabeni lweRichards Bay Minerals (RBM) esengcupheni yokuvalwa uma isiteleka esesiholele ekubulaweni kukanogada wale nkampani siqhubeka.
UMchunu ngokubambisana noNgqongqoshe wezokuThuthukiswa koMnotho, ezokuVakasha neMvelo KwaZuluNatal uMnuz Sihle Zikalala nowezokuThutha uMnuz Mxolisi Kaunda baye eRBM ngoLwesine beyoxoxisana nazo zonke izinhlaka ezithintekayo.
NgoMsombuluko kubulawe unogada wakwaRBM uMnuz Vusi Mhlenyane (34) abaphathi bale nkampani bavele bayivala.
Uphenyo lukaMchunu luveza ukuthi kunabasebenzi abahlangana endaweni okuthiwa yiMarikana eseduze kwaseRBM, okuyibona abahlasela izimoto zale nkampani, bavimbe umgwaqo bahlasele abasebenzi nabanye abantu abasebenzisa umgwaqo oya eRBM.
Laba basebenzi baqashwe yinkampani esebenzisana neRBM i-Unitrans/Ubunye, bafuna ukunyuselwa amaholo basitelekeni esingekho emthethweni.
Ngempelasonto kuthiwa abatelekile bantshontshe impahla yakwaRBM baba nodlame kwaze kwadutshulwa.
UMchunu uthe ukuvalwa kweRBM kuzoba nomthelela omubi emnothweni waKwaZulu-Natal. “IRBM ikhokha intela enkulu emnothweni waKwaZulu-Natal njengoba ifake u-R1.3 billion ngonyaka odlule. Iphinde yasebenzisa u-R4.8 billion ngokuthenga izinsiza ezehlukene,” kusho uMchunu.
Isikhulu esiphezulu sakwaRio Tinto ephethe iRBM, uMnuz Bold Baatar esizinze ekomkhulu lale nkampani eLondon, sithe kubuhlungu ukulahlekelwa ngumsebenzi wabo. Sabonga uhulumeni ngokungenelela odabeni.
UMchunu uthe isimo sizoqashwa ngamaphoyisa, kuphenywe ukubulawa kukanogada waseRBM futhi umkhuzi wamaphoyisa osabambile KwaZulu-Natal uGeneral Nhlanhla Mkhwanazi uzobhekana nezigameko zobugebengu kule ndawo.