Kusemahlombe ethu ukuthi silwe namanga ngolomhlaba
ZIYAQALA izigcawu zokuzwa imibono yomphakathi ngesiphakamiso sokuthi kushintshwe isigaba 25 soMthethosisekelo okungaholela ekutheni kuthathwe umhlaba ngaphandle kwesinxephezelo.
Ubalulekile umbono wakho kwinhlolovo yokubheka ukuthi isigaba 25 soMthethosisekelo esibhekele amalungelo okuphathwa komhlaba kumele yini siguquke.
Esontweni elisombulukayo, amalunga ePhalamende azotheleka kwelikaMthaniya ukuzozwa imibono yabahlali.
Kubalulekile ukuphuma ngobuningi bethu sibe yingxenye yomkhankaso kahulumeni wentando yeningi.
Kusemahlombe ethu ukuthi sibeke uvo lwethu olucatshangiwe, lwacutshungulwa, lwaveza imibono yethu ephelele nezokwenza ukuthi izizukulwane ezizayo ziziqhenye ngathi.
Izigaba eziningi ngaphansi koMthethosisekelo azivikeli ngokukhethekile amalungelo abantu abangumsinsi kuleli.
Kumele kuqhakambiswe ukuvikelwa kwamalungelo abantu baseNingizimu Afrika.
Umhlaba kumele uphathwe uphinde ugcinwe nguhulumeni.
Singakhohlwa i-Deeds Office ephethe imininingwane yokukanywa kwemimhlaba.
Ukuphiwa amandla nangokuxhasa lezi nhlaka esengizibalile kungenza ukuphathwa komhlaba kuleli kube lula.
Ukukhishwa kwamalungelo okusebenzisa umhlaba akulawulwe nguhulumeni ozokwazi ukuthi nokubheka ukuthi ungakanani umhlaba okungenziwa ngawo inzuzo kodwa ohleli.
Izinkantolo zinamandla okuqinisekisa noma ukuguqula izethulo ezizobe zenziwe nguhulumeni. Uhulumeni kuzomele ubeke izizathu zokuthi kungani umhlaba uthathwa.
Lokho kuvimba uhulumeni angabi namandla angadingeki.
Lokhu kuvula nentuba yokufuna ubulungiswa ezinkantolo uma usola ukuthi uhulumeni uthatha isinqumo esingenabulungiswa.
KwelikaMthaniya sineSilo Samambandla esisizwa iNgonyama Trust ukulawula ukusebenza komhlaba ongaphansi kwaso.
INgonyama Trust inganikezwa amandla afana nakahulumeni uma kulawulwa umhlaba.
Kufanele lesi sikhungo sinikezwe uxhaso ukuze sikwazi ukuphatha kahle ukusebenza komhlaba.
Isigaba 211 no-212 soMthemethosisekelo sichaza ngokuhlonishwa, ukugcinwa nesidingo sobaholi bendabuko. Siphinde sivikele sihloniphe uNgangezwe lakhe nobuholi baKwaZulu.
Uhulumeni akudingeki athathe umhlaba ongaphansi kweNgonyama Trust, kufanele angenelele ekusebenzeni kwayo.
Amaqembu ezepolitiki anomsebenzi obalulekile wokuthula imibono yabalandeli bawo, aphinde abe nomsebenzi wokuletha umhlahlandlela wokuthi umhlaba uzosentshenziswa kanjani uma usukuhulumeni.
Akumele sigxile ekutheni umthemthosisekelo awushitshe kodwa kungacaciswa ukuthi uzobhalwa kanjani.
Kusemahlombe ethu ukuthi silwe namanga. Izinsolo zokuthi ezolimo zizokwehla yimibiko engaqinisekisiwe. Ukuze umlimi akhiqize izitshalo athole nenzuzo akuwona umbandela ukuthi umhlaba kumele ube ngowakhe netayitela libize yena.