Ubona besengenza kahle kweyeCAF
UKAPUTENI weMamelodi Sundowns, uHlompho Kekana, akaboni iqembu lizokhinyabezeka ngokushiya kwabadlali abamqoka emzileni weCAF Champions League.
ISundowns izodlala ne-As TogoPort yaseTogo emdlalweni wesithathu wamaqoqo weChampions League kusasa ngo-3 ntambama. Ayikawini nowodwa umdlalo esigabeni samaqoqo.
AmaBrazilians anamaphuzu amabili ewathole ngokudlala ngokulingana neHoroya emdlalweni ophele ngo 2-2 ekuhambeni. Ngaphambi kwalokho iSundowns ibambane nompetha iWydad Athletics yaseTunisia ngo 1-1 ekhaya.
Eqhulwini likaGroup C kuhlezi iWydad ngamaphuzu amane. Ilandelwa yiHoroya yaseGuinea esaqoqe amane emidlaleni emibili. La maqembu azobe egadulisana nawo kusasa ngo-6 ntambama eGuinea. ITogo-Port isahlulwe kuyona yomibili imidlalo yamaqoqo.
ISundowns izoqala impilo entsha ngaphandle kukaKhama Billiat noPercy Tau okungabadlali abayenzele lukhulu kwiChampions League. UBilliat wenqabile ukuvuselela inkontileka, wasayina kwiKaizer Chiefs. UTau udube ukuziqeqesha neSundowns ngoba imnqabela ukuyodlala phesheya.
UmeuPatrice ukhiphe
ngameli Motsepe umyalelo wokuthi adedelwe ayofeza iphupho lakhe emazweni. ISundowns ibhalise u-Andile Jali kwiChampions League.
“Kuhlale kwenzeka ebholeni ukuthi abadlali baqhubeke nezimpilo zabo. Kusukela ngafika lapha sengibonile abantu befika, behamba. Ngakho akukho okusha. Kufanele sizame ukuqhubekela phambili, siphile nalabo abasele. Ngicabanga ukuthi eminyakeni edlule sibhekane kahle nalokhu uma kukhona abahambayo nabafikayo. Kungokwethu thina esesihlale kakhulu ukuthi sisize labo abafikayo ukuthi sibakhombise ukuthi izinto zenziwa kanjani lapha kwiSundowns,” kusho uKekana.
Nakuba ekhuluma kanjena uKekana kodwa umqeqeshi uPitso Mosimane uzwakalise ukukhathazeka ngokuphazamiseka kweqembu lakhe abekade eselakhe isikhathi eside, wakhala ngokuthi kuzoba nzima ukuvala izikhala zabadlali abahambile. ISundowns inengcindezi yokuthola amaphuzu agcwele ukuze izozibeka ethubeni lokudlulela esigabeni esilandelayo kwiChampions League.
“Ngicabanga ukuthi lo mdlalo kuzoba ngohluke kakhulu uma ubheka indlela esidlale ngayo kwemibili edlule. Lona uzohluka ngoba asikhathele futhi sinemibono emisha. Sithole ithuba lokulungisa amaqhinga abedinga siwabhekisise. Sithole amasonto amathathu okuzilungiselela. Ngicabanga ukuthi leso sikhathi sanele ukubuyisa amandla,” kusho uKekana.
“Sifuna ukuzama ukuqala kahle eTogo ukuze sizo-zibeka endaweni enhle eqoqweni. Ngicabanga ukuthi asikude kakhulu. Uma siwina eTogo sizoba namaphuzu ayisihlanu nokuzosibeka endaweni yesibili kwi-log. Sifuna ukwenza lokho ukuze sizibeke ethubeni elihle. Asiqalanga kahle ngoba kade sibhekene nemidlalo eminingi, sifuna ukubuyisa isicoco seligi. Manje konke sekugudlukile.” ISundowns izophinda idudulane ne-AS Togo-Port ngoJulayi 27 eMzansi.