Zishintshile izinto ePhefeni: Katsande
INJINI yeKaizer Chiefs, uWillard “Salt &Vinegar” Katsande, ikufanisa nokufika kukaCristiano Ronaldo ePhefeni ukusayina komkhaya wakhe uKhama Billiat ochayise amaqembu aphesheya kwezilwandle.
UBilliat ungomunye wabadlali abane abasayine kuMakhosi ngaphambi kokuqala kwesizini ka-2018/2019 okukhona kubona unozinti uVirgil Vries nomdlali wasemuva uLetlhogonolo Mirwa.
IChiefs ivikele iBokone Bophirima Maize Cup emuva kokwehlula iFree State Stars kowamanqamu ngo 6-5 kumaphenathi eJames Motlatsi Stadium, eNorth West, ngoMgqibelo. Emdlalweni wokuqala Amakhosi adlule kwiBuya Msuthu edlala kwiABC Motsepe ngo 2-0 wamagoli kaBernard Parker noYusuf Bunting odlala eqenjini leMultichoice Diski Challenge.
UBilliat, Vries noMirwa badlale okokuqala phambi kwabalandeli beChiefs. UBilliat udlale ibhola aziwa ngalo kwiMamelodi Sundowns nabalandeli bakhombisa ukulithakasela. Ukufika kukaBilliat kwiChiefs kushintshe okuningi ngobekucatshangwa ngabalandleli abebehlala begxeka imenenja yeqembu, uBobby Motaung, ngokungasayinisi abadlali abasezingeni eliphezulu.
UKatsande uthe ukufika kukaKhama kushintshe izinto eNaturena. Kunenkolelo yokuthi naye ufake isandla ekutheni umkhaya wakhe aqoke iChiefs.
“Ngeke ngisho ukuthi ngibe nesandla ekutheni uKhama asayine eqenjini. Kodwa siyamazi uKhama ukuthi ungumdlali onjani. Kusukela efike eNaturena useshintshe okuningi kubadlali futhi wonke umuntu ulobizela ukufaka umfutho ngaphezu kwalokhu azokwenza. Ungumdlali obalulekile eqenjini,” kusho uKatsande.
“Njengoba ubonile umdlalo wethu uhluke kakhulu. Ukufika kwakhe kufana nokuba noNeymar noma uRonaldo eqenjini. Uzonikeza abadlali ukuzethemba ukuze badlale ngokuzinikela. Njengomfowethu, bengifuna ukuthi azodlala lapha. Ngiyazi ukuthi kunjani lapha. Sengihlale amasizini ayisishiyagalombili futhi ngiphethwe kahle. Ngimtshelile ukuthi ayikho indawo efana neKaizer Chiefs, akeze, ngeke azisole.”
NgoMgqibelo bekuyithuba lokuqala lomqeqeshi omusha uGiovanni Solinas lokubona abadlali bakhe ensimini nakuba ebengahlezi ebhentshini ngenxa yokuthi usalungisa imvume yokusebenza eMzansi. Ubekade eqeqesha iFree State Stars kumasizini edlule.
“Ngicabanga ukuthi kube yisinqumo esihle (ukuqasha uSolinas). Uma ngibukela kude ngendlela abekade eqeqesha ngayo iFree State Stars, ngicabanga ukuthi kukhona eza nakho, uzokwengeza okukhulu eqenjini lethu. Wonke umuntu ukulungele ukusebenza naye sibone ukuthi singazuzani,” kusho uKatsande.
“Iqembu lakhe lihlala lihlelekile futhi lidlala ibhola elihle. Uma ubheka thina sinabo abadlali abakwazi ukudlala ibhola, lihlale ngakithina. Leyo yindlela yakhe. Ngicabanga ukuthi kuhle ngasohlangothini lwabalandeli nawo wonke umuntu. Sesibe ndawonye isikhathi eside. Ngebhadi imiphumela kade singayitholi. Kodwa ngicabanga ukuthi ngokuzethemba nenjabulo, imiphumela izotholakala. Njengoba ubonile kule midlalo emibili, umbango wejezi mkhulu. Ukuqeda amasizini amathathu ngaphandle kwendebe akuyona into enhle. Asizele ukuzoqopha umlando omubi lapha futhi senza konke okusemandleni. Sizwa ubuhlungu kodwa esingakwenza ukuzikhotha amanxeba, siqhubekele phambili. Sizame ukuwina indebe yokuqala okuyiMTN8.”
NgoMgqibelo iChiefs izobhekana neMamelodi Sundowns emdlalweni weShell Helix eFNB Stadium, ngo-3 ntambama.