Isikhalo se-ANC ngephini lemeya ‘elinendlu yomxhaso’
KUKHALWA ngePhini leMeya yaseNquthu okusolwa ukuthi lahlomula ngendlu yomxhaso.
Lezi zinsolo zivezwe yi-ANC ngesikhathi inokhukhulelangoqo wemashi ebingoLwesihlanu yokukhala ngentuthuko nenkohlakalo.
UNksz Nothile Zungu kuthiwa uhlomule ngendlu obekufanele inikezwe umndeni ohlwempu.
UMnuz Bulelesi Ntshangase, oyiphini likaSihlalo we-ANC eNquthu ngaphansi kwesiFunda inkosi Bhambatha uthe: “Kunenqwaba yezindlu esesithole ukuthi kufakwe kuzo abantu ababengazibhalisele. UZungu kade aba yikhansela futhi useke waba yiMeya yaseNquthu kodwa sishaqekile uma sesithola ukuthi ukwabahlomule ngendlu yomxhaso. Akugcini lapho kodwa kunesinye isikhulu esiqashe umndeni waso okubalwa omakoti bamadodana aso nabashana. Ngisho iMeya, ikhansela uMabilabila Kunene, igxambukela ohlelweni lokukhishwa kwamathenda ngendlela exakile,” kusho uNtshangase.
I-ANC ikhale nangokungcola kwedolobha nogesi ongakhanyi emgwaqweni nokwenza izigebengu zicanase.
Ikhale nangokuntuleka kwamanzi nemigwaqo ewubhuqu eselokishini nemigodi edala izingozi zezimoto.
UNksz Zungu eziphendulela uthe indlu bayithola engakabi yikhansela futhi akusiyo eyakhe kodwa ekanina uNkk Getrude Mkhwanazi. Uthe maningi amakhansela e-ANC ahlala kulezi zindlu futhi aseyazixhuma. Uthe okushiwo ngaye kumphatha kabi ngoba uma esethutha kuzothiwa useshiya abantu abamvotela.
Okhulumela uMasipala, uMnuz Thokozani Nyandeni, uthe bazitholile izikhalo kanti bazozibhekisisa kahle.
“Nokho okunye abakushoyo akulona iqiniso futhi akunasisekelo. Iphini leMeya alinayo indlu yomxhaso kodwa isihlobo salo esinendlu futhi sayithola kudala. IMeya ayihlangani namathenda futhi nohlelo lokukhishwa kwawo ayilwazi ngakho amanga lawa abawashoyo,” kusho uNyandeni.
Uthe ngisho uhlelo lokuqashwa kwabasebenzi luvulelekile ngakho akekho umuntu oqashwa ngomkhonyovu.