Umsindo ngolwamaphoyisa
SEKUQUBUKE umsindo ngohlelo lokuqashwa kwamaphoyisa kaMasipala weTheku emuva kokuthi amalungu omphakathi ekhale ngokuthi kuqashwa abagwazayo noma abazana nabathile.
UMasipala ufake isikhangiso ekhasini lawo likaFacebook ngoLwesihlanu uthi ufuna abantu abazogcwalisa izikhala zamaphoyisa.
Ubalule ukuthi kufanele kube ngabantu abalolongekile, abanesitifiketi sika-matric, ilayisensi yokushayela, abaphakathi kweminyaka kuka-18 no-35 futhi abangakaze balahlwe yicala lobugebengu.
Abantu bathe sekuphele iminyaka begqigqa uma kunezivivinyo ukuze baqashwe, baziphase kodwa kuze kube manje abaqashiwe.
Abanye bathi kugwazwa ngoR15 000 futhi kuqashwa abazana namakhansela noma abanezihlobo ezisebenza kuMasipala weTheku.
USenior Superintendent Parboo Sewpersad wamaphoyisa kamasipala uthe akusilo iqiniso okushiwo ngabantu ezinkundleni zokuxhumana ngoba kulandelwa yonke imigomo uma kuzogcwaliswa izikhala.
“Sifuna ukugcwalisa izikhala ezingu-400, sifake isikhangiso esivulelekile ukuze wonke umuntu athole ithuba lokufaka isicelo somsebenzi. Abantu bayavivinywa kubuka wonke umuntu ekolishi eliseLahee Park, akekho ogwazayo ngoba zonke izinhlelo zethu zivulelekile,” kusho uSewpersad. Uthe abantu abakhalayo abafuna ukungena ngenkani noma sebefeyile izivivinyo.
“Ngesikhathi sivule ithuba kwabafuna ukuba ngamaphoyisa kuMasipala weTheku sathola ukuthi abantu abangu-120 ababefake izicelo sebeke balahlwa ngamacala abucayi okubalwa kuwo awokubulala, ukweba nokunye. Siyabagqugquzela abafuna ukuba ngamaphoyisa kamasipala ukuthi beze ezivivinyweni bazibonele ngokwabo ukuthi ayikho indaba yomgwazo,” kusho uSewpersad.
UNksz Nicole Graham ohola ikhokhasi yeDA kuMasipala weTheku uthe yize bejabula ukuthi umasipala uzoqasha amanye amaphoyisa kodwa ngeke bazibe izikhalo zabantu abasola ukuthi kunenkohlakalo ohlelweni lokuqashwa kwamaphoyisa.
“Sizitholile izikhalo zabantu futhi sizokwenza isiqiniseko sokuthi ziyaphenywa bese kuthathwa izinyathelo ezifanele. Sike sizwe ukuthi abantu bafunwa ubulungu be-ANC uma befaka izicelo zomsebenzi eMkhandlwini weTheku, yimbi leyo nto futhi kufanele iphele. Yingakho sizolubika ezikhulwini eziphezulu zikamasipala nasophikweni oluqinisekisa ukuthi kulandelwa yonke imithetho kumasipala,” kusho uNksz Graham.
UMnuz Mthunzi Gumede okhulumela iMeya yeTheku, uNkk Zandile Gumede uthe kuyishwa ukuthi kunezinkulumo ezinjena ekubeni abantu bengakaze beze nobufakazi obuphathekayo.
Uthe uhlelo lokuqashwa kwamaphoyisa luvulelekile kodwa uma kukhona abanombono wokuthi kufanele lwenziwe ngenye indlela umasipala uzoyamukela imibono yabo.
“Abantu bangabikela neMeya yeTheku uma kukhona abangeneme ngakho ngoba ibakhathalele bonke abantu baleli dolobha. Bangabika ngokushayela u-031 322 8200, 080 311 1111 naku-0800 20 20 20,” kusho uGumede.