UShenge uxwayise amadoda eMUT
AMADODA kumele afunde ukuhlonipha umuntu wezifazane, uma kungenzeki lokho isizwe singagcina sishabalele.
Lokhu kushiwo uMntwana uMangosuthu Buthelezi kwethulwa ngokusemthethweni isigaba sokuqala sebhilidi eseliphothuliwe elizohlala abafundi, eMangosuthu University of Technology (MUT), obekuhambisana nokuvulwa komthombo oqanjwe ngomfundi wakulesi sikhungo okwaboshwa owayeyisoka lakhe, uMnuz Thabani Mzolo ngokubulawa kwakhe, ngoMgqibelo.
UShenge uthe izigameko zakamuva zokuhlukunyezwa nokubulawa kwabesifazane zihlasimulisa umzimba, okuhlanganisa nokubulawa ngesihluko kukaZolile owadutshulwa esendaweni ehlala abafundi bakulesi sikhungo eThekwini, ngoMeyi .
Usihlalo womkhandlu wenyuvesi uMnuz Moirale Moirale uthe ukubulalwa komfundi esebhilidini elihlala abafundi lenyuvesi, yisehlakalo esingeke sikhohlakale.
“Siyazibophezela ukuthi sizoziqinisa ezokuphepha ezindaweni ezihlala abafundi bakule nyuvesi. Sifisa umthombo ungabi wumhlobiso kodwa kube amanzi okuphila nesikhumbuzo sokuthi siyazisola ngento eyenzeka kumfundi esendlini yakhe,” kusho yena.
Umcimbi ubuhlangene nokubekwa kwephini likashansela, uDkt Duma Malaza.
UNgqongqoshe weMfundo ePhakeme kuleli, uNkk Naledi Pandor, uthe umnyango wakhe ukhiphe uR90 million wokulungisa izindawo zokuhlala zabafundi. Uthe uR20 million uzoya eMUT, ukuze kuqedelwe le indawo esiqaliwe.
UNkk Mabongi Myeni okhulumela umndeni kaZolile uthe bajabule ngokwesekwa abakuthola kubafundi nakubaphathi besikhungo.
“Besingalindele ukuthi isikhungo singenza okuthile okuzohlale kuyisikhumbuzo sikaZolile,” kusho uNkk Myeni.
USandile Dlamini umengameli wesigungu sabafundi uqinisekise uNkk Pandor ukuthi bazokwenza okusemandleni ukuthi imali yokwakha ekhishwe ngumnyango isetshenziswa ngendlela efanele.