Ikhwelo likangqongqoshe koweVuma FM
UNGQONGQOSHE obhekele abesifazane ehhovisi likamengameli, uNkk Bathabile Dlamini, uphonsele imindeni inselelo wathi mayikhulise izingane zabafana nezamantombazane ngendlela efanayo ukuze kuliwe nesihlava sokuhlukunyezwa kwabesifazane.
UNkk Dlamini ukusho lokhu emcimbini obuwenziwe yiVuma FM obizwa ngeVuma 103 Imbizo 2018, obuse-ICC Arena ngempelasonto.
UNkk Dlamini ukusho lokhu benikezwe ithuba lokukhuluma beshintshana nabavela ezinhlakeni ezehlukene ngesihlava sokuhlukunyezwa kwabesifazane nezingane.
“Kumele sibheke umsuka wokuthi kungani abesifazane bebukeka ngendlela ehlukile kwabesilisa. Emakhaya uma intombazane ikhula iphathwa ngendlela engafani nomfana. Emakhaya sifundiswa ukuthi intombazane kumele ifunde imisebenzi yasekhaya ukuze ibe umakoti oqotho kusasa. Abafana bona kuyavunywa ukuba bazihlalele emgwaqweni bazidlalele. Lokhu kumele kuphele ngoba kugcina owesifazane ecindezelwa owesilisa,” kusho uNkk Dlamini.
Uqhube wathi akungagcinwa ngokukhuluma kodwa abantu babheke eceleni uma bezwa kukhona ohlukumezekayo.
“Kumele siyeke nokuba yisizwe esikhulumayo kodwa singenzi lutho ngesikushoyo,” kusho uNkk Dlamini.
La mazwi afakazelwe uNgqongqoshe wezokuPhepha eKZN, uMnuz Mxolisi Kaunda, obemele uNdunankulu uMnuz Willies Mchunu ongaphumelelanga kulo mcimbi, othe abantu besilisa kumele kube yibona abahamba phambili ekulweni nokuhlukunyezwa kwabesifazane bangagcini ngokukhuluma ngakho.
“Kumqoka ukuba sihlangane emcimbini walolu hlobo sikhulume ngalesi sihlava kodwa okukhulu ukuba sikwenze lokhu. Uma ungumuntu wesilisa ubona owesifazane ehlukumezeka kumele kube uwena osizayo, uwena okumele ube ngumvikeli wabesifazane,” kusho uKaunda.
Emcimbini bekukhona nezinyane leSilo, uMnuz Nhlanganiso Zulu, wenhlangano iSibaya Samadoda, uNkk Zama Ntshalintshali oyiphoyisa noXolani Dube ongumholi wabafundi e-UKZN.
UNksz Pearl Sokhulu ongumphathi weVuma FM uthe babone kufanele bahlangane kulo mcimbi bakhulume ngokuhlukumezeka kwabesifazane nezingane ukuze kube nesisombululo kulesi sihlava. Abalaleli bomsakazo bebephume ngobuningi.