Bafuna kuxoshwe uGordhan
ABALANDELI bomengumengameli uMnuz Jacob Zuma banxusa i-ANC ukuba imkhombe indlela uNgqongqoshe wamabhizinisi kahulumeni uMnuz Pravin Gordhan abamsola ngokucindezela abamnyama.
Abalandeli bakaZuma ezifundazweni ezehlukene bazoqhinqa ngaphandle kwekomkhulu le-ANC, eLuthuli House, namhlanje ukuze bazwakalise izikhalo zabo.
UMnuz Nkosentsha Shezi, weRET Champion KwaZuluNatal, uthe bafuna i-ANC ithathe izinyathelo ngoGordhan zingakapheli izinsuku eziyisikhombisa kusukela namhlanje. “Lesi yisiqalo somkhankaso wethu ohlose ukukhipha uGordhan emsebenzini, uma i-ANC ingazithathi izinyathelo zingakapheli izinsuku esiyibekele zona, sizophoqeleka ukuthi siwuqinise umkhankaso wethu kodwa angingabazi ukuthi uyothi uphela uGordhan uyobe engaseyena ungqongqoshe,” kusho uShezi. Uthe uGordhan ucindezela izikhulu ezimnyama emabhizinisini kahulumeni ukuze zibukeke njengabantu abangawazi umsebenzi nabakhohlakele. “Enye inhloso kaGordhan wukuthi angene agamanxe ekulawulweni kwamabhizinisi kahulumeni khona ezoqhubeka nokuzicebisa yena nabangani bakhe abangongxiwankulu abamhlophe,” kusho uShezi.
Uthe kumanje uGordhan uhlukumeza isikhulu esiphezulu sakwaTransnet uMnuz Siyabonga Gama.
“UGordhan akabafuni abantu abamnyama abaphumelelayo, lokhu akwenzayo kuphambene nomgomo kahulumeni we-ANC wokuguqulwa kwezisekelo zomnotho, uma i-ANC izimisele ngokuqhuba uhlelo lokuguqulwa kwezisekelo zomnotho kumele imgudluze uGordhan,” kusho uShezi.
Uthe mathathu amabhasi azosuka eKZN azobe ethutha abantu abaqhuba umkhankaso wokuxosha uGordhan.
“Akhona namanye amabhasi azobe ephuma nakwezinye izifundazwe kanti namaqabane aseGoli nawo azobe ekhona, ngingasho nje ukuthi silindele amakhulu abantu,” kusho uShezi.