Ulahlekelwe yisinkwa owephoyisa
UMNDENI wephoyisa elibulewe, ehostela KwaMashu ukhala ngokuphucwa insika ngokubulawa kwelungu lawo.
UConstable Mbiko Buthelezi (36) ubesebenza nozakwabo oneminyaka engu-28 naye onguConstable ngesikhathi behlaselwa ababulali ehostela KwaMashu, ngoLwesihlanu.
Udadewabo uNksz Nano Buthelezi (27) uthe kunzima ukwamukela ukuthi umuntu obeyikho konke emndenini wakhe akasekho.
“Ubesondla esigadile njengoba singenabo abazali sebashona. Umfowethu ubenezingane ezintathu azifundisayo nezabafowethu ezimbili. Nami angisebenzi, sonke besibheke yena. Konke bekwenziwa uyena ekhaya. Njengoba bembulele kufana nokuthi basibulele nathi. Ukuboshwa kwabambulele ngeke kusisize ngoba ngeke kumbuyise,” kusho uNksz Buthelezi.
Uthe umngcwabo bawuhlelela uMgqibelo, eClermont.
Ngokombiko wamaphoyisa, bebeqaphe isimo behlaselwa ngo-6 ntambama. Kuthiwa kwezwakala kuqhuma isibhamu.
Abasolwa kuthiwa babalekile. Iphoyisa elilimele liyalulama esibhedlela.
Kusuka ngoLwesihlanu kutshwalwe amaphoyisa KwaMashu. Ezokuphepha ziqinisiwe. Ngokuthola kweSolezwe amaphoyisa abengena nasezindlini zabantu, kumiswa izimoto ziseshwa. Kuthiwa bekukhona nebhanoyi elinophephela emhlane.
Ibamba lomkhuzi wamaphoyisa kuzwelonke u-Lieutenant General Lebeoana Jacob Tsumane esitetimendeni esithunyelwe kwabezindaba likugxekile ukubulawa kwamaphoyisa.
NaseGauteng kubulawe elinye iphoyisa elineminyaka engu-36, eMalvern ngoLwesihlanu.
“Besenza kahle ekulweni nobugebengu kodwa sekugcina kuhlaselwa thina. Umphakathi mawuhlangane kuliwe nokubulawa kwamaphoyisa,” kusho uTsumane.
UTsumane udlulise amazwi enduduzo emndenini yamaphoyisa abulewe.