Thola kabanzi ngenkampani ozotshala kuyo imali: Kamlana
UNGASHESHI ukuthatha isinqumo sokutshala imali yakho ungazange uzinike isikhathi sokwenza uphenyo ngenkampani ozoyitshala kuyo.
Lokhu kushiwo nguMnuz Unathi Kamlana oyiPolicy Statistics and Support eBhange loMbuso ngesikhathi kunesigcawu sokucobelela ngolwazi oluthinta imali ebesihlelwe yiSolezwe ngokubambisana neSouth African Reserve Bank, eThekwini, ngoMgqibelo.
Lesi sigcawu besigxile ekuqwashiseni umphakathi ngokutshala imali emabhanoyini ngethemba lokuthi imali izobuya isiphindaphindiwe.
Uthe abantu abaningi bangena ezinkingeni ngenxa yokuthi basuke sebebheke kakhulu inzuzo okuthiwe bazoyithola uma befaka imali, bangabe besabheka ukuthi ngabe yona leyo nkampani inalo yini igunya.
U-Advocate Logan Balakrishna oyiPrudential Authority Divisional Head eBhange loMbuso utshele abebethamele isigcawu ukuthi zonke izinkampani ezitshala imali zisuke zithembisa inzuzo.
“Zibuze ukuthi njengoba ebhange imali ongase uyithole uma utshale imali kulo ingeke idlule ku-10%, kwenziwa yini ukuthi kulezi zinkampani imali eyinzuzo ibenkulu kangaka. Ngokuvamile isikhathi sokutshala imali yakhona siba ngaphansi kwaleso esijwayele ukubekwa ngamabhange. Qaphela, ungavumi ukuyengeka kalula,” kusho yena.
Uqhube wathi amabhanoyi ahlukene kabili kukhona elithembisa ukukunikeza inzalo enkulu ngemali oyitshalile. Uthe abangene kuqala kulolu hlobo bayayithola inzuzo abethenjiswe yona, ngesikhathi banda abajoyinayo, inkampani iyehluleka ukubakhokhela bonke, liwe ibhanoyi.
Uhlobo lwesibili uthe kuba yinkampani ethembisa imihlomulo emihle uma ujoyinisa abanye abantu nakhona kuthenjiswa imihlomulo emihle.
“Okubi kakhulu ukuthi abantu babika uma ibhanoyi seliwile kungasekho okuningi okungenziwa. Uma seliwile akulula ukuthi imali ibuye, inkampani isuke ingasenayo imali.”
UMnuz Mzwakhe Jina, ukufakazelile obekushiwo uBalakrishna, njengoba ethi yena wafaka imali izikhawu ezintathu ebhanoyini yabuya iphindaphindiwe.
Wafaka imali enkulu ngokulandelayo, ayibange isabuya wafika ehhovisi kulenga ingidi abantu bekhala ubumayemaye ngaphandle, ibhanoyi seliphahlazekile.
UKamlana uthe ukuhweba ngemali eyigugu njengekaMandela nemali endala yinto ekhona, uma ufuna ukwenza lokho kumele ufune ulwazi oluyilo, unganikezi umuntu ongamazi imali emakhoneni ekuthembisa ukuthi uzokudayisela yona.
Ulwazi ngale mali uthe lutholakala ku www.samint.co.za