Sigodliwe isinqumo ngemayini
SIGODLIWE isinqumo sokuthi kuvalwe imayini yamalahle eseMtubatuba iTendele Coal Mine ebiyiswe enkantolo ngamalungu omphakathi angafuni ukuthi kuqale isigaba sesibili sokunwetshwa kwayo.
NgoLwesihlanu, amalungu omphakathi akhele imayini abesenkantolo enkulu eMgungundlovu ekhala ngokuthi iphula imithetho yokusebenza.
U-Adv AJ Dickson obehambisana no-Adv Mawande Mazibuko emele umphakathi, uthe kufanele ivalwe ngoba ayizange ixoxe nomphakathi ngezinhlelo zokuyinweba.
Uthe iTendele ibulala imvelo ngomoya ongcolile. Uthe ngisho amanzi emvula aba mnyama, abantu abakwazi ukuwasebenzisa.
Uphinde wakhala ngokuthi iTendele igumba amathuna abantu okuyinto ephambene nomthetho.
Uthe alinazo izinhlelo zokulahla udoti njengoba umthetho wezezimayini ufuna kube nohlelo olucacile lokuvikela imvelo.
IJaji uRishi Seegobin libuzile ukuthi ngabe uDickson uyazi yini ukuthi uma kuvalwa imayini kunabantu abazolahlekelwa wumsebenzi futhi nomkhakha weFerrochrome oncike emkhiqizweni weTendele uzothikamezeka ngoba baningi abantu abaqashwe kuwo.
USeegobin ubuze uDickson ukuthi ngabe uyawubona yini umnotho wezwe ukuthi awuqhubi kahle, ngabe kufanele yini ivalwe thaqa imayini?
UDickson uthe abafuni ivalwe unomphelo kodwa bafuna ivalwe isikhashana kuze kube ilandele imithetho yokusebenza.
Ummeli weTendele u-Adv Peter Lazarus, uthe ngesikhathi iTendele iqala ukusebenza ngo-2007 imithetho okuthiwa iyiphulile yayingakasebenzi kodwa uyavuma ukuthi odabeni lwamathuna kuke kwaba nobudedengu.
“ITendele iyayilandela imithetho yokusebenza futhi nasodabeni lwamathuba ikulungisile obekukhalwa ngakho. Akusona isixazululo ukuthi kuvalwe imayini ngoba yonke imiphakathi eyakhele imayini iyahlomula,” kusho uLazarus.
U-Adv Dennis Sibuyi obemele abasebenzi baseTendele, izinyunyana, umkhandlu wenkosi neMpukunyoni Community Mining Forum uthe bangu-1 500 abazophelelwa yisinkwa uma kuvalwa imayini futhi umphakathi uzosala uncela izithupha ngoba awekho amafemu kule ndawo.
IJaji uSeegobin lisigodlile isinqumo lathi licela abameli bazo zonke izinhlangothi bangalithinti ngesikhathi esacubungula leli cala.
“Wudaba olunzima lolu, oluthinta inhlalakahle yabantu, imisebenzi, imvelo nomnotho. Ngizodinga isikhathi ukuthi ngilucubungule ngaphambi kokuthi nginqume okuthile. Kungathatha ngisho izinyanga ezintathu ukuthi ngize nesinqumo,” kusho uSeegobin.