Abamnyama bamfundise isifundo u-Adam Catzavelos
NGESONTO eledlule kuzamazame iNingizimu Afrika ngenxa ye-video eveze indoda yomlungu ebiziqopha isolwandle eGreece icwasa abantu abamnyama.
Kule-video,uMnuz Adam Catzavelos,uziqophe ebika isimo sezulu eveza nokuthi ujabule kanjani ngokuthi “alikho nelilodwa ikhafula” nathe lokhu kufana “nezulu emhlabeni.”
UCatzavelos, ongumnikazi wenkampani i-St George’s Fine Foods ngokubambisana nomndeni wakhe uxolisile emva kwezinsukwana kuvele le-video, cishe ezama ukubhula umlilo njengoba kunamakhasimende avele azihlangula kubo.
Umndeni wakhe washeshe wamemezela ukuthi akaseyena omunye wabanikazi benkampani ngoba usedayise amasheya akhe. Kodwa ingcindezi yabantu abamnyama ezinkundleni zokuxhumana ibilokhu iqhubekile nokwenze amanye amakhasimende abo anqamula izinkontileka abenazo nabo.
Eminye imibiko iveze ukuthi uvaliwe nokuthi anyathele emagcekeni esikole okufunda kuso izingane zakhe.
Lokhu kubambisana okwenziwe ngabantu abamnyama bokufaka ingcindezi ekuthenini uCatzavelos ajeziswe kuhle futhi kuyadinga ukugqugquzelwa.
Imvamisa uma kunezigameko ezifana nalezi lapho kuvela khona izenzo zokucwasa ngokwebala, isijeziso kuyaye kube yinto engathi shu. Okwenzeke kuCatzavelos kuzoba yisifundo impela ngoba manje imiphumela yesenzo sakhe ishaye lapho kuzozwela khona impela njengoba nomndeni wakhe uthole amachaphazelo.
Kuyisicefe ukuthi selokhu kwaphatha uhulumeni wentando yabantu eNingizimu Afrika, abantu abamnyama yibona okufanele bahlale belula isandla futhi behlela ngezansi kwezinye izinhlanga.
UCatzavelos wayeziqopha nje, kukhona labo abathumelela le-video abavumelana nalokhu ayekusho. Kuyafuneka kuzanywe ukubuyisana kodwa kufanele ibhekisiswe le nto yokuthi kunezinto eziningi ezingagonyulukiwe okufanele kudlulwe kuzo.
Kufanele kukhulunywe ngobandlululo olusaqhubeka namanje nangokuthi ukubuyisana akusho ukuthi abantu abamnyama yibona kuphela okumele behlele ngezansi.