Ugijimise okwengqwele kokaMandela
UQHUBEKILE nokukhonya emijahweni yaseNingizimu Afrika umgijimi wase-Ethiopia uSintayehu Legese Yinesu edla ubhedu kwiMandela Marathon abeqala ukuyigijima eMgungundlovu izolo ekuseni.
Lo mgijimi ubeqala ukungenela lo mjaho okubungazwa ngawo owayengumengameli wokuqala wentando yabantu eNingizimu Afrika. Wunyaka wesikhombisa uba khona lo mjaho kanti kulokhu bewuhambisana nemigubho yeminyaka ewu-100 kwazalwa uMandela.
Abantu bebephume ngobuningi njengoba silinganiselwa ku-24 000 isibalo sabangenele umjaho. UYinesu ugijimise okwengqwele eshiya labo abebekade bezihola phambili bagcina bephelelwe umfutho.
Lo mgijimi weNedbank osewine iSoweto Marathon kathathu ungene entambeni eMandela Capture Site ngo-2.28.06. Endaweni yesibili kungene umgijimi waseLesotho uMabuthile Lebopo ngo-2.29.12. Indawo yesithathu yathathwa uMark Oyogu waseKenya ngo-2.31.04. Nakwebesifazane kukhonye abagijimi bangaphandle kunqoba uLoice Jebet waseKenya (2.50.010, uSelam Abere Alebachew wase-Ethiopia (2.5322) nomkhaya wakhe uTsega Galani Reta (3.0325).
Endleleni uYinesu udlule uTsepo Ramonene obekade ezihola phambili indlela ende cishe sekusele u-10km. URamonene obesendaweni yesibili, ubesebonakala ukuthi ayaphela amandla ubesevele edlulwe umkhaya wakhe waseLesotho umakadebona uLibopo.
Akuzange kuthathe isikhathi esingakanani, uLibopo wezwa ngezigi zikaYinesu zisondela. Uthe eqamba eqalaza ngemuva kwacaca ukuthi lo mgijimi waseEthiopia useseduze wadlula ngejubane wadonsa njalo esebheke indawo yokuqala.
UYinesu onqobe iSoweto Marathon ngo-2014, 2015 nango-2016, uthe ubezimisele ngokushaya irekhodi elisha lomjaho. Elikhona kwabesilisa lingu-2.27.12 nelabekwa uThobani Chagwe ngo-2014. URamonene akabange esaqeda.
“Ngijabule ngokunqoba iMandela Marathon. Bengingalindele ukuthi umzila