Kunconywa ovumbululwe yiNedbank
LIQHAKAZILE ikusasa lomdlali osemncane weBloemfontein Celtic obesematheni ngempelasonto ephula izinhliziyo zabalandeli be-Orlando Pirates.
UBongani Sam (20) ushaye igoli iCeltic inqoba ngo 1-0 emdlalweni we-Absa Premiership phambi kwezinkulungwane zabalandeli beSiwelele eFree State Stadium.
USam, oyibamba ohlangothini kwesokunxele emuva, ngomunye wabavumbululwe wuhlelo lweNedbank Ke Yona. Ubeseqenjini labaqokiwe ngo-2017.
Ngalowo nyaka u-Owen Da Gama wayengomunye wabaqeqeshi abebehamba izifundazwe bebheka ithalente elisha. USam ungene kubadlali abawu-18 abenze isikwati esidlale nompetha beNedbank iSuperSport United, wabe esethathwa yiCeltic.
“ICeltic imdlalise esikwatini sayo seMotsepe League,” kusho uDa Gama.
“Ngoba bengimazi ukuthi unethalente elinjani sibe sesicela ukumboleka siyiHighlands Park. Ufike wasisiza kakhulu njengoba sigcine sikhuphukile kwiNFD. Ngijabule kabi ngesikhathi eshaya igoli. Ungumdlali ozimisele ngokufunda. Uma eqhubeka nokuzithoba nokulalela uzoba ngomunye wabadlali abaphambili kuleli.”
Uthe bebengathanda ukumgcina kwiHighlands.
“Kepha akukho ebesingakwenza uma iqembu lakhe selimdinga futhi ngijabule ngokuthi liyamsebenzisa”.
USam, odabuka eMotherwell e-Eastern Cape, useyidlale yonke imidlalo yeCeltic selokhu kuqale isizini iholwa nguSteve Komphela, futhi ayikangenelwa yigoli emidlalweni emithathu.
ICeltic ayikashaywa. Emdlalweni wayo olandelayo izobhekana neKaizer Chiefs eFNB Stadium ngoLwesithathu oluzayo. IChiefs izobe ilwela ukuwina umdlalo wokuqala inomqeqeshi omusha uGiovanni Solinas. Ngaleso sikhathi uSam nozakwabo bazobe bebheke ukuqhubeka nokuqoqa amaphuzu.
Khonamanjalo iqembu lakulo nyaka le Ke Yona lizobhekana nompetha banyakenye beNedbank iFree State Stars ngoSepthemba 9.
Abanye abadlali abavumbululwe wumqhudelwano asebenezinkontileka namaqembu akwiPremiership, ngu-Aubrey Modiba, oyibamba kwiSuperSport United, noBongani Mdluli, osenenkontileka neFree State.