IChiefs ethubeni elingcono kwiMTN 8
KUQINE izinkulumo ngokuhamba kukaSiphiwe Tshabalala kwiKaizer Chiefs engabonwa nangokhalo ngesikhathi idlala ngokulingana neSuperSport United emdlalweni womlenze wokuqala weMTN8 eLucas Moripe Stadium, ePitoli, izolo ntambama.
Amagoli eSuperSport ashaywe nguBradley Grobler esiwombeni sokuqala. AweChiefs abekwe enethini nguKhama Billiat kwesokuqala noLeonardo Castro kwesesibili.
Ekupheleni kwesonto eledlule kusabalale ukuthi uTshabalala ufunwa yiqembu laseTurkey i-Erzurumspor esanda kukhuphukela esigabeni esikhulu. Imenenja yeChiefs uBobby Motaung ithe abafuni ukuyibamba isavele ngekhanda ngoba akusikhona okokuqla uTshabalala efunwa amaqembu aphesheya kodwa kugcine kungenzekanga, wathi bazomemezela ngokusemthethweni uma sekukhona okwenzekile.
Nokho ukungabi khona ngisho ebhentshini cishe kuqinise izinsolo zokuthi uyahamba phezu kokuba umqeqeshi uGiovanni Solinas eveze ukuthi uthintekile ejimini. Ubonakale ehleli noMotaung enkundleni egqoke isudi.
Emdlalweni wayizolo, iChiefs icindezele zibekwa. Icishe yashaya igoli emuva kwamanenjana umdlalo uqalile ngesikhathi ibhola eliyingozi eligotshwe nguBilliat kwesokunxele lichithwa wudonga lweSuperSport. Nokho Amatsatsatsha asheshile ukuswabuluka. Ngomzuzu ka-11, acishe athola igoli ngesikhathi unozinti weChiefs, u-Itumeleng Khune ephambana nebhola ebhokisini kukade kuyikhona kodwa laphuma phezu kwepali. Ngomzuzu ka-21 uBilliat ubeke Amakhosi phambili eqobela phakathi ibhola ebeliphaswe nguDumisani Zuma emuva kokugqobhoza udonga lweSuperSport. Emuva kwemizuzu emibili uKhune uvimbe ibhola likaBradley Grobler.
Ngomzuzu ka-26 uGrobler uphenduke noRamahlwe Mphahlele ebhokisini, walivalela phakathi. ISuperSport iqhubekile nokuhlasela. Ishodi likaDean Furman lishaye ipali labuyela enkundleni ngomzuzu ka-30. Sekusele imizuzu eyisihlanu kuyiwe ekhefini, uGrobler ushaye elesibili emuva kwebhola elide eliphoswe lawela ebhokisini nguPhumlani Ntshangase. Esiwombeni sesibili, iChiefs ihlasele okokuqala yathola igoli ngonyawo lukaCastro emuva kwebhola aliphaselwe nguBilliat ngomzuzu ka-47. Emuva kwemizuzu embalwa uCastro uphenduke umvusi wenyamazane ephakela uBilliat kodwa ibhola lakhe laphuma eceleni kwepali. IChiefs iqhubekile nokwakha amathuba, kubhoke kakhulu uSiphelele Ntshangase, Billiat noZuma kodwa yahluleka ukuwasebenzisa.
Unozinti weChiefs, u-Khune, utakule ezakhe echithela phezu kwepali ishodi likaGrobler kukade kuyikhona eshaywe nguThuso Phala. Nakuba abalandeli beChiefs, abebephume ngobuningi, bengajabulanga kangako ngomphumela wayizolo kodwa banelisekile kwazise bayazi ukuthi iqembu liwukhathulile umsebenzi ngaphambi komdlalo womlenze wesibili ozoba ngoMgqibelo eFNB Stadium ngo-8.15 ebusuku.
Uma umdlalo ungaphela kuwu 0-0 noma kuwu 1-1 kuzoqhubeka iChiefs ngoba ishaye amagoli amabili ekuhambeni.