Kuthinte abaningi ukushona kukaHHP
KUTHINTE abaningi ukudlula emhlabeni kwesihlabani somculo wehip-hop uHHP, odlule emhlabeni izolo.
Abantu bakuleli nosaziwayo emikhakheni ehlukene badlulisele amazwi enduduzo emndenini wakhe.
Abaningi bashaqekile ngesikhathi bezwa izindaba zokudlula kwale ngwazi.
Omunye wabo kube u-AKA obhale ukuthi: “Ngisanda kuzwa izindaba ezimbi, enye ingwazi ayisekho.”
NoRouge ubhale ukuthi: “Unyaka omubi emculweni we-hip hop...NjengoHHP..Lala Ngokuthula.”
UCassper Nyovest uvele wethuka kakhulu wathi: “Akusilo iqiniso leli, ngeke!”
U-DJ Cleo uthe: “Ukube ngangazi ukuthi sikhuluma okokugcina ngangingeke ngiluvale ucingo, ngangiyoqhubeka ngikhulume nawe.”
UBoity Thulo uthe: “Ngisaqhaqhazela. Kwenzenjani?”
Nehhovisi likaMengameli lidlulisele amazwi enduduzo njengoba livezwe ukuthi lezi zindaba zibathusile.
“Umndeni, izihlobo nabangani sengathi bangaduduzeka. Sengathi ungalala ngokuthula Jabba.”
UTumi Morake uveze ukuthi akazi nokuthi athini ngezindaba zokudlula kwalesi sihlabani.
Umlingisi u-Amanda Du Pont uthe uNkulunkulu sengathi angaba nomndeni wakhe, silahlekelwe iqhawe.
U-DJ Fresh akandanga ngamaningi uvele wathi: “Ulale ngoxolo HHP.”
UZakwe uthe: “Lala ngokuthula qhawe lakithi, hamba kahleJabba.”
UDuncan naye ngomunye ongandanga ngamaningi njengoba evele wathi: “Lala ngokuthula Jabba.”