Kusenzima ukwamukela ukuthi uHHP akasekho: abangani
UMNDENI nabangani bengwazi yehip hop uJabulani “HHP” Tsambo edlule emhlabeni ngoLwesithathu bathi kusenzima ukwamukela ukuthi akasekho.
Yize kunemibiko yokuthi umculi wodumo lwezingoma okubalwa kuzo ethi Jabba, Tswaka, Bosso Ke Mang nezinye uzibulele kodwa akekho ofuna ukuchaza ngokuzibulala kwakhe.
Wayeseke washo ukuthi unokhwantalala nokuthi wake wazama ukuzibulala kathathu.
Umngani wakhe ongumdidiyeli, uThabiso Tsotetsi, uthe ubesebuyela esimeni esinguJabba, elinye igama likaHHP, abamaziyo.
“Umndeni nathi sizama ukuqina. Yisikhathi esinzima kodwa siyamelana naso,” kusho uThabiso ohlelweni lwasekuseni lwakuSABC, iMorning Live.
Umchaze njengomuntu obekuyintokozo ukuba naye futhi obehlale ebagqugquzela.
“Ubewumngani wami omkhulu kunabo bonke.” Uthe uzohla ekhumbula indlela abenza ngayo estudiyo. Ubengena athi akudlalwe umculo bese kungapheli sikhathi esingakanani abhale amavesi bese eyaqopha.
Omunye umngani wakhe, uKeabetswe Modimoeng, uchaze uHHP njengomuntu obenamancoko.
“Ubephana ngesikhathi sakhe futhi ephana nangethalente lakhe.” Uthe uphelelwe ngamazwi. Omunye umngani ongumrepha ophuthume emndenini ngemuva kokuzwakala kwezindaba, uShugasmakx, uthe balimele kakhulu ngokudlula emhlabeni kwakhe.
“IBosso isishiye kabuhlungu. Ngo-2015 sishiywe yinkosi yehip hop yase-Alexandra (uFlabba), ngo-2018 kuhambe eyaseSoweto (uPro) manje futhi ngo-2018 sekuhamba eyaseMafikeng.”
Amalungiselelo omngcwabo abengakaphothulwa.