Lisobishini iphoyisa ‘ebelibukhile’
Jay Naicker usiqinisekisile lesi sigameko, wathi umphathi waleli phoyisa waziswe umndeni obubize amaphoyisa ngalesi sigameko. Iphoyisa elithintekayo liyalelwe ukuthi libuyele ekhaya. “Umphathi walo ube eseludlulisela kumphathi wesiteshi lolu daba. Womabili amaphoyisa abeye kulo mndeni ayaphenywa yize ebelishayela kade lingaphuzile. Ngenxa yokuthi lehluleke ukunqaba ukusebenza nomuntu obonakalayo ukuthi uphuzile, nalo libonakala njengomuntu ongaziphathanga kahle. Iphoyisa elibonakala kule video liphucwe isibhamu somsebenzi, okwamanje lizokwenza imisebenzi yangaphakathi,” kusho yena
Uthe babonga umphakathi ngokuhlaba umkhosi uma kunenkohlakalo nokungaziphathi kahle emaphoyiseni.
Unobhala wenyunyana yamaphoyisa South African Police Union (SAPU), uNkk Nurse Mdletshe uthe umphathi waleli phoyisa naye kumele aphendule ukuthi ulithume kanjani ebe elibona ukuthi liphuzile.
“Iphoyisa aliphumi esiteshini lingakhishwanga umphathi walo, yena ubengaliboni yini ukuthi liphuzile lize libonwe umphakathi nje. Ngokubona kwami naye lo mphathi unobudedengu, kumele aphenywe,” kusho uNkk Mdletshe.
Uqhube wathi amaphoyisa awaziqoqe uma enza umsebenzi wawo ngoba uma engakwenzi lokho kunamathuba amaningi okuthi kube nelungu lomphakathi elibonayo elizothatha i-video, liyenekele izwe.
“Ubufakazi obunjengalobu abuphikiseki futhi ngeke sithi umphakathi awungawathathi ama-video uma ubona okungahambi kahle. Ozakwethu abaziphathe kahle, ukuvela kwezinto ezinje kuyasehlisa isithunzi samaphoyisa,” kusho yena.
UNksz Nthabeleng Molefe unobhala wenyunyana yamaphoyisa iPoprcu KwaZuluNatal usigxekile isenzo sephoyisa elisebenza liphuzile, wathi abaphathi kumele baqaphele ngoba kuyenzeka izehlakalo amaphoyisa ahlangabezana nazo emsebenzini zigcine ziholele ekutheni azinikele ophuzweni oludakayo.
“Abaphathi kumele babheke abasebenzi ukuthi abashintshile yini, uma bebona ushintsho kumele babasize ngohlelo olukhona lokubasiza, uma kunesidingo banikezwe imisebenzi yangaphakathi baze balulame, kungalindwa kuze kwenzeke isigameko esinjengalesi, “usho kanje.
Kuvela le video nje, amaphoyisa aseNewcastle nawo asehlazweni njengoba kune-video esatshalaliswe ezinkundleni zokuxhumana ewakhombisa ehamba ngemoto yamaphoyisa iNyala, ephelezela ingane yomphathisiteshi eyayiye emcimbini wokuvaleliswa kwabafundi, i-matric dance.
Sigxekwe kakhulu isenzo sala maphoyisa abonakala kwivideo ephethe amahawu zinsiza ezivikela izinhlamvu ekake ingane nophathina wayo beyongena endaweni yomcimbi.
Mayelana ne-video yamaphoyisa aseNewcastle, uNksz Molefe uthe ngokuthola kwakhe amaphoyisa ayehambele i-matric dance eyofundisa abafundi mayelana nokuthi izicukuthwane zivikelwa kanjani ezihlweleni, okuyingxenye yohlelo olwaziwa ngeSocial Crime Prevention.