Ingane (10) ibuyiswe ‘enkulisa’ isishonile
UFUNA izimpendulo umndeni waKwaMashu wengane enezinyanga ezingu-10 abathi ibuyiswe enkulisa egadwa kuyo isishonile kade ihambe iphila saka.
UKusaselihle Manqele ushone ngeledlule ngoLwesine kade ephuma enkulisa agadwa kuyo eNgcongcweni, eNanda .
Ngokusho komndeni, le ngane owesifazane oyigadayo emzini wakhe, uyibuyise eyisongile wayilalisa phezu kukasofa.
Uma beyivula ingane bathole isiluhlaza, iphuma igazi ngamakhala.
Uma beyiphuthumisa emtholampilo kutholakale ukuthi bese kunesikhathi ishonile.
UNksz Dana Manqele unina omdala wale ngane uthe bafuna lo wesifazane ogada ingane achaze ukuthi uyenzeni ingane.
“Ingane yabuyiswa umama oyigadayo isongiwe wayibeka kusofa wathi ilele. Kwakukhona ugogo wengane, ongazange ayivule ingane. Umama oyigadayo wathi abahambe bayothenga ubisi (benogogo wengane) ukuze ezoliphuzisa ingane ngoba uyizwa inokukhwehlela. Bahamba bayishiya nomfana oneminyaka engu-12. Ugogo esebuya eyembula ingane wayithola iluhlaza emzimbeni, iphuma negazi emakhaleni. Emtholampilo eyaphuthunyiswa kuwo kwathiwa kudala ishonile. Esikufunayo ukuba achaze lo wesifazane ukuthi kwenzakaleni enganeni,” kusho uNksz Manqele.
Lo mndeni uze wavula icala esiteshini saseNanda ngalesi sigameko.
Isolezwe lithinta lo wesifazane ogada izingane oneminyaka engu-50 ocele ukungadalulwa igama, uthe yena akazange ayibulale ingane.
“Ingane ngayishiya ilele kusofa iphila, ngayilalisa kusofa ngoba yayilele.
“Ngiqanjelwa amanga manje kuthiwa mina ngidlise ingane ushevu. Le ngane bengiyithanda njengezinye izingane engizigadayo, ngingayibulala kanjani?” kubuza lo wesifazane.
Elandisa Isolezwe uthe wayeyothengela ingane ubisi ngesikhathi eyilethile ngoba wayeyibona inomkhuhlane.
“Ingane yayikhwehlela ingaphefumuli nakahle ngabe sengithi kungcono ngiyithengele ubisi abazoyiphuzisa lona. Okusho ukuthi iphutha lami kwaba yilelo njengoba sengifela into engingayazi,” kusho lo wesifazane.
Uthe usenesikhathi egadela omakhelwane izingane zabo, ezinye zikhulile zinemizi yazo, ezinye ziganile akakaze abulale ngisho neyodwa ingane.
“Osekungiphatha kabi ukuthi ngiyahlaselwa, ngiyasatshiswa ngoba ngisolwa ngodaba lwengane. Kumanje ngithole incwadi yokuba bangasondeli kumina. Kungiphatha kabi lokhu okwenzekayo ngoba abantu bangithembile ngezingane zabo,” kusho lo wesifazane.
Uphinde wachazela Isolezwe ukuthi akanayo inkulisa kodwa usiza imindeni ethize agade izingane zayo ngoR300 abafaka inabukeni nangoR250 abangalifaki inabukeni, ngenyanga. Kumanje uthe ugada izingane ezintathu zabantu bangaphandle nezinye zomndeni wakhe ezintathu.
Okhulumela amaphoyisa KwaZulu-Natal uColonel Thembeka Mbele uthe kuvulwe idokodo ngokushona kwale ngane, bazolinda ucwaningo lokuhlolwa kwesidumbu oluzocacisa ukuthi ingane ibulawe yini.