Ufakazi ukhomba ngenjumbane uRamaphosa
UMSOLWA wokuqala ecaleni lokubulawa kwesishoshovu se-ANC eMoses Mabhida, uMnuz Msawakhe “Qashana” Mchunu, utshele iNkantolo yesiFunda yaseMgungundlovu izolo ukuthi uMengameli Cyril Ramaphosa noNgqongqoshe wamaPhoyisa kuleli, uMnuz Bheki Cele yibona abagqugquzela ukuthi aboshwe.
Ekhuluma esebhokisini lofakazi njengoba kade efaka isicelo sebheyili, uMnuz Nkosinathi “TK” Gambu (37) oyikhansela laku-ward 10, KwaPata, eMsunduzi, uthe ngesikhathi amaphoyisa embopha amtshela ukuthi anohlu lwamagama abantu okumele ababophe.
“UMengameli Ramaphosa wafika kubo kamufi ngemuva kwesigameko nokuyilapho ayalela khona uNgqongoshe wamaPhoyisa uCele ukuthi aqinisekise ukuthi bayabanjwa ababulali bakaMchunu,” kusho uGambu.
Uthe ubona ukuthi amaphoyisa ayenengcindezi yokuthi abophe ngecala likaMchunu kulandela umyalelo kamengameli.
Ugxeke amaphoyisa ngokuzigaxa ezindabeni zezombusazwe.
“Amaphoyisa akasawenzi umsebenzi wawo ngendlela efanele kodwa asetshenziswa osopolitiki ukulwa izimpi zabo,” kusho uGambu.
Unxuse inkantolo ukuba ilibhekisise leli cala ngoba linenhlese yepolitiki.
“Ngicabanga ukuthi lona owaluma amaphoyisa indlebe ngathi wabheka ngobuhlangothi wathatha nangokuthi thina besinombono wezepolitiki ongafani nokamufi nokwaholela ekutheni siboshwe,” kusho uGambu.
Uthe ziningi izinto ezazingadala ukuthi uMchunu abulawe njengoba kade engahambisani nenkohlakalo ehlale ehola amamashi futhi engahambisani nokuthi kubanjwe ingqungquthela ye-ANC esifundazweni.
“UMchunu ngaphambi kokuthi abulawe wahola iqulu labantu elalifuna ukungena ngenkani emhlanganweni we-ANC eHowick nokwaholela ekutheni axabane nonogada owaze wamkhiphela isibhamu,” kusho uGambu. Ebuzwa ukuthi angaphawula athini ngephepha okuthiwa lisayinwe ngabantu abangu-40, abangafuni ukuthi bathole ibheyili, uGambu uthe inkantolo akumele iyikhulume indaba yalelo phepha ngoba alikho emthethweni.
“Ngalibona lelo phepha kuthiwa lisayinwe ngabantu bakwaPata kodwa kukhona negama likaMnuz Nzuzo Gwala waseSinathingi, lokhu kusho ukuthi baningi abantu abasayinisiwe abangasibo abakwaPata yingakho ngicele abameli bami ukuthi leli phepha balidlulisele kochwepheshe abakwazi ukucwaninga into ebhaliwe ngoba ungathola nokuthi bekubuye kusayine umuntu oyedwa esayinela abantu abaningi,” kusho uGambu.
Uthe naye baningi abantu abafuna adedelwe njengoba esejele kanti nentuthuko imile endaweni. Icala lihlehliselwe isonto elizayo uLwesibili, uLwesithathu noLwesine.