Kuhlaselwe ikhansela kwashiswa nomuzi walo lilele nezingane
KUPHENYWA icala lokushisa umuzi wekhansela laseMazabekweni ngaphansi kukaMasipala waseBuhlebezwe elihlaselwe lilele nezingane zalo ezimbili ngoLwesithathu ebusuku.
UNksz Nancy Jili oyikhansela ku-ward 12 uhlaselwe ngabantu abangaziwa abashise umuzi wakhe okukholaka ukuthi baphonse ibhomu likaphethroli kuwo.
Okhulumela amaphoyisa uColonel Thembeka Mbele, uthe uNksz Jili ubelele nezingane ngabo-9 ebusuku ngesikhathi ezwa umsindo.
Uthe uvukile wathola ukuthi indlu iyasha waphuma ngewindi nezingane. “Kushe yonke into ebiphakathi, akukaziwa imbangela yokushiswa kwalo muzi amaphoyisa ayaphenya. Kuphenywa icala lokushisa emaphoyiseni aseXobho,” kusho uCol Mbele.
UNgqongqoshe wezokuBusa ngokuBambisana neziNdaba zoMdabu esifundazweni uNkk Nomusa Dube-Ncube, unxuse amaphoyisa ukuthi aqinise ezokuphepha emakhanseleni ahlalele engozini.
Uthe kumele bathathelwe izinyathelo ezinqala abenza lokhu ngoba kubeka izimpilo zamalungu omndeni wekhansela engozini.
“Akukhona okokuqala ehlaselwa njengoba phambilni kukhona abadubula bebhekise kwakhe babaleka. Sikhathazekile ngalezi zehlakalo ezenzeka kumakhansela esifundazweni alokhu esatshiswa,” kusho uNkk Dube-Ncube.
Unxuse abangaba nolwazi ukuthi basize ukuze babanjwe abenze lokhu.
“Sithumele ithimba ukuthi liye eBuhlebezwe liyohlola umonakalo sibheke nezindlela esingazisa ngayo umndeni kaNksz Jili.”