URamaphosa umise abashushisi emsebenzini ngamacala athinta imali
UMENGAMELI Cyril Ramaphosa umise emsebenzini iPhini loMqondisi wezokuShushiswa koMphakathi u-Adv Nomgcobo Jiba no-Adv Lawrence Mrwebi onguMqondisi wezokuShushiswa koMphakathi ngamacala athinta imali, ukuze kuphenywe ukuthi bakufanele yini ukuba kulezi zikhundla zabo.
URamaphosa umemezele lezi zindaba izolo ntambama esho nokuthi uphenyo lokuthi o-Adv Jiba noMrwebi bakufanele yini ukuba sezikhundleni zabo luzophathwa yiJaji leNkantolo yoMthethosisekelo eselathatha umhlalaphansi uNkk Yvonne Mokgoro.
“Emuva kokubona ukuthi kunezinsolo zokuthi anikufanele ukuba sehhovisi ngithathe isinqumo sokunimisa emsebenzini ukuze ngiqinisekise ukuthi ezobulungiswa zisebenza ngendlela, ikakhulukazi uma kuthintwa amacala enkohlakalo nokusetshenziswa kwemali yezwe. Niphethe izikhundla eziphezulu kwezokushushisa yingakho kufanele nime emsebenzini kuze kuphothulwe uphenyo ngokuthi nifanelekile yini ukuba kulezi zikhundla,” kusho uRamaphosa.
Kuzokhumbuleka ukuthi o-Adv Jiba noMrebi bake bamiswa emsebenzini emuva kokuthi inkantolo inqume ukuthi bakhishwe ohlwini lwabameli ngo-2016. Lesi sinqumo siye sachithwa yinkantolo yokudluliswa kwamacala ngoJulayi walo nyaka. U-Adv Glynnis Breytenbach okhulumela iDA kwezobulungiswa uthe bayasamukela isinqumo sikaRamaphosa sokuphenya ukuthi u-Adv Jiba noMrwebi bakufanele yini ukuphatha izikhundla zabo ngoba abakufanele ukuphatha lezi zikhundla.
Uthe iNingizimu Afrika ifanelwe wukuba nabashushisi abahlonipha umthetho hhayi laba abasebenzisa umbuso ukufeza izinhloso zabo.