Bathini ngolokuncishiswa kwekhabhinethi?
ABAHLAZIYI bezepolitiki bathi ukuncishiswa kwekhabhinethi ngezinye zezinto ezingenza ukuthi kwehle imali esetshenziswa ukukhokhela amaholo.
USolwazi Bheki Mngomezulu, osophikweni lwezifundo zepolitiki enyuvesi yaseWestern Cape uthe kodwa ngaphambi kokuncishiswa kwekhabhinethi kumele kubuzwe ukuthi sifike kanjani kulesi simo esikusona.
Uthe iminyango eminingi yakhiwa ngemuva kokubonakala kwesidingo sayo.
“Uma ubheka uMnyango wezokuThuthukiswa kwamaBhizinisi aMancane oholwa nguNksz Lindiwe Zulu wakhiwa ngemuva kokubonakala kwesidingo sokuthi ngeke kufukulwe umnotho bengekho osomabhizinisi abancane. Kwaba nesiphakamiso sabhungwa ePhalanende kwavotwa ngaphambi kokuba kwakhiwe lo mnyango neminye. Akubanga isinqumo sowayenguMengameli ukuthi kube nale minyango,” kusho uMngomezulu.
Uthe kungamele kube nezingxoxo bese kuba nesiphakamiso sifakwe bese kuvotwe uma sekumele sincishiswe isibalo sekhabhinethi.
Omunye umhlaziyi ozimele uMnuz Thabani Khumalo, uthe ukuncishiswa kungasiza kongeke imali echithwa nguhulumeni ukukhokhela abasebenzi.
Uthe ikhona iminyango engahlanganiswa okubalwa owezamabhizinisi uhlanganiswe nowezomnotho nohwebo.
“Ikhona eminye engasebenza ngaphandle kwamaphini ongqongqoshe ngoba awadingeki. Kumele umengameli ayibheke le ngaphambi kokuba aye kodiliza abasebenz.”
Abahlaziyi basho lokhu nje uNgqongqoshe wezimali uMnuz Tito Mboweni, ukhalile ngekhabhinethi wathi inkulu kakhulu isidingo singekho.
Uthe okungenani kumele kube nabantu abangu-25 kuya phansi ngoba okwamanje baningi kakhulu njengoba bebalelwa ku-70 kubalwa namaphini ongqongqoshe.
UMengameli Cyril Ramaphosa wathi bayayibheka eyokuthi kwehliswe ikhabhinethi. UMngomezulu uthe inkinga ngoRamaphosa ngukuthi ufuna ukwanelisa wonke umuntu okhalayo.
URamaphosa wathi uma kwenzeka lokhu kungenzeka ngemuva kokhetho lwangonyaka ozayo.
UMboweni uthe iChina inomnotho osimeme kodwa ikhabhinethi yayo incane kakhulu kuneyakuleli.
UMngomezulu uthe njengoba kuyiwa okhethweni akukho siqinisekiso sokuthi i-ANC ingabuyela ibe iyona ehola izwe ngemuva kwalolu khetho. Uthe kungenzeka noma yini wathi kungaba khona nohulumeni wokubambisana kwamaqembu bese kushintsha yonke into.