Umshushisi uthi uyabanjezelwa kwelomfundisi Tim Omotoso
UMSHUSHISI obephikisana nesicelo sommangalelwa sokuthi kufunwe elinye ijaji ecaleni abhekene kulo namacala okudlwengula uthi uyabanjezelwa.
UMshushisi Nceba Ntelwa ubephawula ngezethulo zoMfundisi Timothy Omotoso namangalelwe nabo eNkantolo eNkulu ePort Elizabeth.
Ummeli ka-Omotoso, uMnuz Peter Daubermann, ufake isicelo sokuthi kushintshwe iJaji Mandela Makaula amsola ngokuthi ucheme nofakazi. Izolo uDaubermann ubengekho enkantolo kodwa ucele u-Advocate Terry Price, athe ungaphezu kwakhe kwezomthetho, ukuthi kube nguye ofaka isicelo.
UMakaula ubeke izethulo zokuthi kungani kumele aqhubeke nokwengamela ukuqulwa kwecala phezu kokuba esolwa ngokuchema. Ukuchema kwejaji kususelwa ekutheni lafisela ukubhala okuhle uNksz Cheryl Zondi (22) ummangali obe ngowokuqala ukuthula ubufakazi.
UNtelwa uthe u-Omotoso nabamangalelwa bahlulekile ukuveza ubufakazi bokuchema kwejaji. Uthe ubona isicelo kuyindlela yabamangalelwa yokubambezela icala.
Liziphendulela ijaji lithe akulona iqiniso ukuthi selivele likholelwa ebufakazini bukaNksz Zondi.
“UNksz Zondi usazoqhubeka nobufakazi. Kusekusha ukuthi sengingathatha isinqumo ukuthi ubufakazi bakhe buyiqiniso. Kusamele kuvele abanye ofakazi engingazi ukuthi bazothini. Angikakakwazi nokuqhathanisa ubufakazi bukaNksz Zondi nobabamangalelwa, okuyiphutha wukuthi sengivele ngicheme nobufakazi bakhe,” kusho uMakaula.
Ngokwezethulo ezibhalwe encwadini efungelwe ka-Omotoso, uthe ukholwa wukuthi ukushushiswa kwakhe kuzoba nogcobho uma kuqhubeka uMakaula. Usola ijaji ngokuthi selivele limtheswe umnqamulezo wokuthi uwenzile amacala abekwe wona.
U-Omotoso ufuna ukuthi isicelo sokuhoxa kwejaji siyiswe eNkantolo eNkulu yokuDlulisa amacala ukuze bathole ukushishwa okungachemile.
UPrice uthe icala linzima hhayi kubameli nje kuphela kodwa ngisho kulo ijaji. Uthe kumele livume ukuthi lishenxe ukuze icala liqulwe kahle. UPrice uchaze ngombuzo kaDaubermann ocasule abaningi, abewubhekise kuNksz Zondi.
UDaubermann wabuza ngobude bobuntu buka-Omotoso. UPrice uthe umbuzo wawubalulekile ngoba uNksz Zondi ubhale izitatimende ezimbili ezishayisanayo. Icala lihlehliselwe uLwesibili oluzayo ilanga okulindeke ngalo ukuthi kukhishwe isinqumo ngesicelo sika-Omotoso.
Izolo enkantolo bekukhona noMnuz Bongani Mkongi oyiPhini likaNgqongqoshe wamaPhoyisa. Bebekhona nababhikishi ngaphandle nabalandeli bakaOmotoso.