‘Angiphenywe uma ngisolwa’
USOMLOMO waseNdumeni, eDundee, usecele ukuba kuphenywe kabanzi ukuze kucace ngezinto alokhu esolwa ngazo zenkohlakalo ekubeni engazazi.
UNkk Bongiwe MbathaMakhathini, ukusho lokhu ephawula ngokusolwa kwakhe mayelana nokuthi uyathinteka enkohlakalweni yamathenda benowesilisa ochazwa ngokuthi unobudlelwane bezothando naye.
Kulezi zinsolo kubalwa ithenda yokuqoqa imfucuza neyonogada nokuthiwa uhlangene kuyo nalo mlisa obuye achazwe ngokuthi unguBen 10 wakhe.
Kuthiwa lo mlisa usemthengele ngisho iFord Ranger Wild Track neBMW 4 Series kodwa zonke lezi zimoto zisegameni lakhe uBen 10.
“Angiphenywe uma ngisolwa. Ngicabanga ukuthi uma ngithinteka ngendlela okuthiwa ngithinteka ngayo kumele kwenziwe uphenyo oluzobe selucacisa kahle ngaleli tulo elenziwa ngami. Mina anginankohlakalo engiyenzayo. Zonke lezi zinto abazishoyo ngami, bazisho ngoba befuna ukudicilela phansi isithunzi sami, futhi namanje ngiyasho kade lolu daba ngiliphendula kusuka ngonyaka odlule. Okunye mina akukho BMW enginawo nengiyishayelayo.” Uthe lo mfana okukhulunywa ngaye ingane eyavele yamthanda naye wayijwayela ngoba ihlonipha futhi iyintandane.
Uthe ngisho embikweni kaNgqongqoshe akukho lapho abalwa khona kodwa kubalwa ikhansela elilodwa.
Uthe usewufundile wonke wawuqeda ngakho akathinteki ndawo.
Nokho i-ANC ayimnike thuba njengoba ithi akachaze ngeFord Ranger ukuthi ekabani nokuthi isegameni lakhe yini.
USotswebhu we-ANC, uMnuz Lucky Khumalo uthe uNkk Mbatha-Makhathini uzama ukucasha ngesithupha uma ephika izinsolo abhekene nazo.
Lo mlisa osolwa ngenkohlakalo noSomlomo kuthiwa uhamba ngeBMW kanokusho.
Imenenja kamasipala, uMnuz Sipho Ntuli, ithintwa ithe icela ukunikwa ihora iyobheka isitatimende sayo esiqukethe konke ukuze iphawule kodwa kuthe uma sekubuyelwa kuyo kwathiwa isibambeke emhlanganweni.
Izolo, kukhishwe zonke izithombe zobeyiMeya yaseNdumeni uMnuz Sboniso Mbatha emahhovisi omkhandlu.