Kunxuswa umphakathi wonge amanzi
INKAMPANI ehlinzeka imikhandlu ngamanzi Umgeni Water isinxuse umphakathi ikakhulu eThekwini ukuthi uqhubeke nokucophelela uma usebenzisa amanzi.
UMnuz Thami Hlongwa, isikhulu esiphezulu sale nkampani engaphansi kukahulumeni, uthe uma ngase kube nesomiso kungaba nenkinga ngoba isidingo samanzi siphezulu siyahambisana namanzi abavele bewahlinzeka kuyimanje.
“Abantu abaqhubeke basebenzise amanzi ngendlela bawonge. Sikhulu isidingo sokuhlinzeka ngamanzi sisahambisana nalokhu esikuhlinzekayo kodwa uma ngase kube nesomiso singaba nenkinga encane,” kusho uHlongwa.
Ukusho lokhu izolo ekhuluma nezintatheli eNkosi Albert Luthuli International Convention Centre eThekwini lapho ebechaza khona ngombiko otholwe yile nkampani wokusebenza kwezimali.
Uthe kuleli akufani namanye amazwe lapho imvula ina umlibe wathi kuleli ina ngezikhathi ezithile.
UHlongwa uthe kuke kwaba nezingxoxo zokuthi uma ngase bahlinzeke isifundazwe sonke ngamanzi kungadla malini.
“Kungadla uR110 billion ukuhlinzeka isifundazwe sonke ngamanzi. Uma sihlinzeka ngamanzi sibuka iminyaka engu-30 ezayo ukuze angapheli,” kusho uHlongwa.
Uthe kuba nzima ukuhlelela izindawo ezisemakhaya ngoba uma kuke kwangena amanzi, abantu bayaqala bakhe bese siba sikhulu isidingo samanzi kanti kulula ukuhlelela indaba yamanzi ezindaweni ezingamadolobha.
UNksz Ziphozethu Mathenjwa, usihlalo webhodi lale nkampani, uthe benze kahle kakhulu onyakeni wezimali u-2017/2018 njengoba bethole umbiko omuhle wezimali kumcwaningi mabhuku jikelele.
Uthe benze inzuzo kaR1.2 billion wathi bazoqhubeka basebenze ngokuzikhandla njengoba befuna ukunyusa inzalo abayenzayo.
“Omasipala bayasikhokhela abekho abasikweletayo. Sizohlinzeka abantu abangaphezulu kuka-7 million ngamanzi ngemuva kokusayina isivumelwano noMasipala wasoThukela ukuthi siwuhlinzeke ngamanzi,” kusho uNksz Mathenjwa.
Uthe kuke kwaba nabazibiza ngamasosha omkhonto nabanye abaqhamuka ezinhlanganweni zosomabhizinisi abebefuna umsebenzi ngenkani.
“Sihlala nabo phansi sizwe izikhalo zabo sifune izinto ezithile ukuze basizakale. Abanye sithola ukuthi abanazo izitifiketi ze-BEE okuyizinto ezidingekayo uma ufuna umsebenzi,” kusho uNksz Mathenjwa.
UHlongwa uthe ngeke baqashe abantu abangenazo izimfanelo.
UNksz Mathenjwa uthe kunozinzo kule nkampani wathi maduze kuzoqokwa ibhodi elisha njengoba beyibhodi lesikhashana.
UMgeni uhlinzeka amanzi uMasipala weTheku, oweLembe, Ugu, Harry Gwala, uMgungundlovu noMsunduzi. UHlongwa uthe amanzi asashibhile ngoba bahlinzeka amanzi amaningi ngemali encane. UHlongwa uphethe ngokuthi ziningi izinhlelo zengqalasizinda yokwandisa amanzi abazenzayo okubalwa ukuthuthukiswa kweDarvill Wastewater Treatment Works, eyaseMidmar nezinye.