Sizosiza umphakathi isikhungo esivuliwe
KUPHELILE ukulibasha ngonyawo ibanga elide ukuze bathole amakhompyutha kubantu baseHambanathi, oThongathi, emuva kokuthi uMasipala weTheku ubakhele isikhungo samakhompyutha esinazo zonke izidingo.
Lesi sikhungo sivulwe ngokusemthethweni yiMenenja kaMasipala weTheku, uMnuz Sipho Nzuza ngoLwesithathu. Uthe umasipala usemkhankasweni wokuqinisekisa ukuthi iTheku liba yidolobha elihamba phambili kwezobuchwepheshe. “Kule minyaka emibili edlule sivule izikhungo zamakhompyutha ezimbili ngoba sifuna abantu bangene kwezobuchwepheshe. Siyazi ukuthi umhlaba usesikhathini esigxile kakhulu kwezobuchwepheshe esibizwa ngeFourth Industrial Revolution, yingakho sifuna abantu babe namakhompyutha lapho behlala khona.”
Isikhungo esivulwe nguNzuza sinamakhompyutha awu-40, sizosiza umphakathi ukuthi ukwazi ukuzibhalela amaCV uphinde ufune namathuba omsebenzi.
UNzuza ucele umphakathi ukuthi usinakekele lesi sikhungo ngoba uma amakhompyutha ebiwe noma ecekelwe phansi, umasipala ngeke akwazi ukuthenga amanye. “Umphakathi waseHambanathi ngeke usahamba amabanga amade uma udinga amakhompyutha. Siyacela uwanakekele ngoba kunomkhuba omubi emiphakathini yethu yokucekela phansi impahla uma kunemibhikisho yezidingo. Kubi lokhu ngoba umphakathi kufanele uvikele ingqalasizinda esiyakhiwe wuhulumeni ukuze akwazi ukuletha ezinye izidingo.”
Uthe sebakhe izikhungo zamakhompyutha ePinetown, eThekwini ku-Old Fort Road futhi bazokwakha ezinye izikhungo eSiphingo, eMagabheni, KwaXimba, KwaDabeka, Inanda, Amatikwe, Vulamehlo, Mayville, Cato Ridge, Clermont, Intshanga, Cornubia naseMaphephetheni. Ukugcizelele ukuthi abantu bazinakekele izikhungo zabo bangazidicileli phansi ngoba uhulumeni uzakhele ukuwusiza.