IZINKONDLO

Izintaba Zokhahlamba

Zinesithunz’ iziNtaba zoKhahlamba, Zikhihlik’ igwebu Kuqhum’ isiphethu sengwebu, Ingweb’ emhlophe njengeqhwa. Sezazimuka nxa zonke, Zikhomb’ ubunjalo beminyaka yazo, Zikhaful’ ubumtoti bomoya, Umoy’ oheleza kutshek’ amathaf’ asoGade

Lapho ngiqhwakele khona ngizibuka.

Impela Zul’ omnyam’ ondlela zimhlophe, Umalundalunda ngemvelo, Ingumceb’ onxenx’ izivakashi Ezitheleka kwaZulu ziphindelela, Zizobon’ oMafukamel’ iqhwa Kusimze kuvel’ ubuqhawe besiqhwaga, Isiqhwag’ esilwa ngamakhaza Ezinye zilwa ngezikhali kuchithek’ igazi. Sebanyuka bephindelela Befun’ iqiniso ngemvelaphi yoKhahlamba

Olukhahlel’ izazi ngobubanzi nobude.

Zinesithunz’ izintaba zoKhahlamba ngiyavuma,

Zingikhumbuz’ isandla sikaMvelinqangi

Esifinyelela lapho kuphela khon’ ukuqonda.

Ngizethulel’ isigqoko ngokuvez’ ubuhle bakhe. Sengosind’ empini yokungazi, Namuhla ngibone isiqalo nesiphetho somlando. Inzondo

Ndonga zibomvu zimakhelekethe,

Uyesabeka kawunakuthandwa,

Ugunde omame yaphela ingqondo

Lashona bebhudla ingwebu yolaka

Kuphuma ngemilomo imikhonto enzima Evusa olele kusinde ofile Ongasenakuzwa ukwenza kwenzondo.

Inzondo edumba umuntu ngochuku,

Imkhiphe kweyakhe ingubo yemvunulo Imenze inceku egenqeza nqunu Inhliziyo yayo ibonwe ngabantu Yenziswa izenzo engazifisiyo Ibanjwe ngomkhala yisandla senzondo

Kuhluphek’ imimoya yabathokozile.

Inceku yenzondo, umuntu komunye,

Ingena kumsizwa akhohlwe wusizo, Izithandani ziphendukelane, Obekungecala kwenziwe icala, Omunye afise omunye makafe, Noma efile ingafi inzondo, Yedlule idumbe omunye kwabanye. Abner S. Kunene