Babuyele emsebenzini Osindisweni
BABUYELE emsebenzini, izolo abasebenzi basesibhedlela Osindisweni abebethi ngeke baqhubeke nokusebenza kulesi sibhedlela kusekhona izikhulu zaso.
Izolo abasebenzi bakulesi sibhedlela abangaphansi kwenyunyana iNehawu abaqale isiteleka ngoLwesithathu, bethi akuhambe umphathi wesibhedlela, umphathi wehhovisi likandabazabantu nomphathi wezezimali bakulesi sibhedlela bame ngaphandle kwesibhedlela kwaze kwafika isithunywa somnyango wezempilo sizobazisa ukuthi kuhlelwe umhlangano ozoba phakathi kwabathintekayo noNgqongqoshe wawo, uDkt Sibongiseni Dhlomo ozoba ngoMsombuloko.
Abasebenzi bathe bazobuyela emsebenzini okwesikhashana besalinde imiphumela yalowo mhlangano kodwa lezi zikhulu kumele zihambe. Ngemuva kokuxoxisana lezi zikhulu kuthiwa ziphume zigadwe ngamaphoyisa.
Iphini likanobhala weNehawu eThekwini, uMnuz Ayanda Zulu, uthe isithunywa ebesithunyelwe umnyango sithe kusazoba nomhlangano phakathi kukangqongqoshe, inyunyana nezikhulu zalesi sibhedlela mayelana nezinkinga zesibhedlela. “Abasebenzi babuyele okwesikhashana emsebenzini njengoba kusalindwe ukuthi kube nalo nomhlangano. Thina sithe ngeke sibuyele emsebenzini uma lezi zikhulu zisekhona. Ngeke ngisho ukuthi isiteleka siphelile, kuzoya ngokuthi umhlangano wangoMsombuluko uqhamuke nasiphi isisombululo.”
Uthe basamile ekutheni basola ukuthi laba abathathu abasichazi kahle isimo salesi sibhedlela, uma bebhalela umnyango umbiko, okuholela ekutheni uMnyango wezeMpilo ungasheshi ukuqhamuka nezisombululo sezinkinga zokushoda kwabasebenzi, ukushoda kwemithi nezinsiza nokungalungiswa kwamabhilidi.
Abasebenzi bathi bahambisa uhla lwezikhalo emnyangweni ngoMeyi, bekhala ngalezi zinto ezingehla kodwa umnyango akukho osukulungisile kuze kube manje wagcina ngemihlangano, ngemuva kwalokho kwathuleka.
Okhulumela uMnyango wezeMpilo kulesi sifundazwe, uNksz Ncumisa Mafunda, ukuqinisekisile ukuthi kuthunyelwe isikhulu somnyango ukuthi siyozwa ukuthi abasebenzi bathini kodwa wathi mayelana nokuthi bamisiwe yini okukhalwa ngabo, wathi usazoqinisekisa nehhovisi likandabazabantu.