Bayavela abasolwa ngokubulala nokweba esitolo
Bongani Mavuso AZOVELA namhlanje enkantolo yaseMadadeni amadoda amathathu asolwa ngokubulala osomabhizinisi ababili athatha imali nempahla yasesitolo Osizweni.
Abasolwa abaneminyaka ephakathi kuka-25 no-61 baboshwe besafake izimpahla ezigcwele igazi, kwatholakala nemali okusolwa ukuthi bayithathe ngesikhathi bebulala.
Ukubulawa kwabanikazi besitolo uMnuz Mosharaf Hosain (33) noLimon Mir, senzeke ngoLwesithathu.
Ngokusho kokhulumela amaphoyisa KwaZuluNatal uColonel Thembeka Mbhele amaphoyisa asoSizweni abeqaphe isimo kule ndawo ngesikhathi ebona isango lesitolo livulwe gengelezi.
“Amaphoyisa amile ebheka ukuthi ngabe kwenzenjani esitolo okuyilapho ezithele pheze kwezidumbu ezimbili zinamanxeba okugwazwa. Kube sekubizwa amanye amaphoyisa, kwaqalwa uphenyo. Kulandelwe amachaphazelo egazi esuka esitolo, aze afika ezindlini ezingemuva kwesitolo lapho kutholwe abasolwa besagqoke izimpahla ezinegazi. Kuboshwe abantu babili, omunye ongumakhelwane wesithathu naye uboshiwe njengoba kutholwe izimpahla ezinegazi emshinini wakhe wokuwasha. Laba bazobhekana namacala okubulala amabili nelokubamba inkunzi. Bazovela enkantolo yaseMadadeni kusasa (namhlanje),” kusho uCol Mbele.
Ngokophenyo lwamaphoyisa abasolwa batholwe nemali okusolwa ukuthi intshontshwe kubagilwa, amabhokisi angu-228 kagwayi, i-airtime nommese okusolwa ukuthi usetshenziswe kubulawa labo somabhizinisi.