Izinkakha zihambisana nokushiwo uMokwena
ABADLALI abake bagijima emidlalweni yabakhaya baseSoweto eminyakeni edlule bathi sekuyocaca enkundleni ukuthi iyiqiniso yini inkulumo eyenziwe yiphini lomqeqeshi kwi-Orlando Pirates, uRulani Mokwena, abeyibhekise kumqeqeshi weKaizer Chiefs, uGiovanni Solinas.
Ekuqaleni kwesonto uMokwena uvungamise abathandi bakanobhutshuzwayo eNingizimu Afrika, ethi iChiefs ibuthaka ebhentshini selokhu kuhambe obengumqeqeshi wayo uSteve Komphela.
Uthe ibhentshi elikhona njengamanje eliholwa uSolinas elekelelwa uPatrick Mabhedi alinawo amasu aqinile okuhlelela imidlalo.
Kukhona abamgxekile uMukwena ngalokhu bathi ukhombise ukungahloniphi izimbangi kanti abanye bathi ukuphonsana ngamazwi yikhona kanye okuzowenza ujiye umdlalo wakusasa wabakhaya baseSoweto.
I-Pirates izobe ingosokhaya uma seyamukela iChiefs emdlalweni we-Absa Premiership eFNB Stadium ngo-3.30 ntambama.
U-Edward Motale owayeyibamba kweZimnyama uthe okwenziwe uMokwena yikhona kanye abebekwenza ngezikhathi besadlala.
“Akukho okubi okushiwo uRulani ngoba wonke umuntu unelungelo lombono ohlukile. Mina lokhu ngikubona kufanele ukuwagqugquzela womabili amaqembu. Kufanele lo omunye athi ‘oh lo uyangidelela ngifuna ukumkhombisa ngoMgqibelo’. Wukuthi nje esikhathini samanje abantu sebaba ntekenteke.
“Akukho mibandela ebholeni (uma kukhulunywa) yingakho ungadingi iziqu ukuze ube wumqeqeshi ngaphandle kwelicense futhi nakhona uyaqeqesha ngaphandle kwayo uma uzimisele futhi unobuchule bebhola. Manje abantu sebehlala emahhovisi bazi ukuthi kumele ucophelele uma ukhuluma. Le nto eyenziwe uRulani yayikhona ngezikhathi zamaPRO, oLouis Tshakoane noPutco Mafani,” kusho uMotale.
Uthe ngezikhathi zabo ukuchukuluzana kwakungamahlalakhona uma kunemidlao yabakhaya.
“Ngangike ngifonele uThabang (Lebese) ngimtshele ukuthi uyeza umdlalo ngizomkhahlela futhi ngeke ngilithole ikhadi elibomvu ngenzela ukumcinanisa. UGavin Lane ngoba akalwazi ulimi lwethu, ngesikhathi simile silinde ukungena enkundleni ngangiya kuyena ngimbuze ukuthi ‘uyamuzwa uDoctor (Khumalo) uthi uzokushaya ngamashibobo ngeke usondele kuye’. Uyofutheleka aye kuyena athi ‘uthini ngami?’, lapho uDoctor akazi nokuthi kukhulunywa ngani, singena enkundleni vele sekushubile,” kusho uMotale.
UFabian McCarthy owayegijima kuMakhosi uhambe emazwini afanayo.
“URulani unombono wakhe kodwa mina ngikholwa ukuthi liqinile ibhentshi leChiefs. Lokhu akwenzayo nathi sasikwenza yize kwakungesikhona esidlangalaleni kanje. Kodwa wawumfonela nje umdlali umchukuluze, umtshele ukuthi ngeke adlule kuwena. Ngethemba ukuthi uMabedi noSolinas kuzobafaka umfutho lokhu akushilo kanjalo nabadlali. Ekugcineni kosuku amaqhinga omqeqeshi awasebenzi kakhulu kowabakhaya. Okubalulekile wukuthi abadlali bona bazimisele kangakanani,” kusho uMcCarthy.
Bobabili bathe babheke umdlalo onamagoli.
“Asiwufuni umdlalo ozophela ngo 0-0. Okungenani sekungamane kube wu 3-3 noma 5-5 uma bedlala ngokulingana,” kusho uMotale.
UMcCarthy uthe yena ubona iChiefs idlula ngo 2-1.