IHyundai Kona eyi-crossover yakhelwe abantu abasebancane
IHYUNDAI yandise umndeni wayo wezimoto eziphakeme ngokwethula iKona eyi-crossover engena phakathi kweCreta neTucson.
Mhlawumbe kuhle ukusheshe ngikubalule ukuthi nayo ilandele ezinyathelweni zezimoto zakwabo ngokuqanjwa ngegama lendawo. ISanta Fe yidolobha laseMexico, iTucson yindawo yase-Arizona kanti iKona iqanjwe ngendawo yaseHawaii.
IKona yakhelwe igenge esencane futhi indlela eyakhiwe ngayo iyawadonsa amehlo, ikakhulukazi uma inombala o-Acid Yellow. Eminye imibala yawo ngoChalk White, Dark Knights, Pulse Red noLake Silver.
Ngaphambili ihlukile ngenxa yokuthi inamaLED Daytime Running Lights ngaphezulu, amaheadlamps phakathi nendawo bese kuthi ngezansi ibe namafog lamps. Ihamba ngamasondo anamarimu angu-17 inch kanti isipele sincane “ibhiskidi”.
Ukuphakama kwayo kungu-17 cm nokuyenza ingahlukumezeki kangako uma ihamba obhuqwini.
Ngaphakathi inemibala oLime kuleyo e-Acid Yellow kuthi kulezi ezinye ube bomvu.
Ingaphakathi layo lihle ngenxa yetouchscreen singu-7 inch esizimele nokwenza kusale lungekho uxhaxha lwamabhathini ngezansi.
Kulesi screen ukwazi ukudlala umsakazo, kuvele ingemuva uma uhlehla kwazise inekhamera, uxhume iselula ne-Apple CarPlay noma nge-Android Auto.
Iqoqekile ngaphakathi lokhu okwenza izihlalo zangemuva zithothane.
Uma umude nje, kungaphela uhambo olude ugoqekile. Isikhala sebhuthi singu-361 litres kanti siyanda uma ufula i-tray elingezansi. Izihlalo zikwazi nokulala ukwandisa isikhala.
IKona ihlukene ngezinhlobo ezimbili, okuyi-1.0 T-GDI Executive manual ne-2.0 NU Executive automatic.
I-1.0 TDGI iyithree cylinder turbocharged engine enamandla angu-88 kW netorque engu-172 Nm. Idonsa ngogearbox oyisix speed manual kanti ijubane layo elikhulu ngu-181 km/h. Bathi ngebanga lika100km/h isebenzisa amalitha angu6.8. Ngesikhathi sihamba ngayo ibidla amalitha angu-7.6.
Enye yi-2 litre naturally aspirated kaphethroli enamandla angu-110 kW netorque engu-180 Nm.
Iyifour-cylinder futhi yona inogearbox oyisix-speed ozishintshayo. Ijubane layo elikhulu ngu-194 km/h kanti bathi isebenzisa amalitha angu-7.2 ngo-100km.
Ngithande i-1.0 futhi yiyo engichithe isikhashana nayo. Ngeke uze usho ukuthi inenjini encane ngoba inamandla yize ibuye ibanjwe yiturbo leg encane uma usuka.
Emgwaqeni ihamba kamnandi futhi nasemakhoneni iyabambelela.
Kwezokuphepha yathola izinkanyezi eziyisihlanu ihlolwa ngabe-Euro NCAP kanti inamabhreki e-ABS, ESP, Downhill Brake Control, Blind Spot Warning neRear Cross Traffic Collision Warning.
Iphinde ibe nama-airbag ngaphambili kanjalo nawasemaceleni namacurtain.
Le moto izobanga abathengi nezimoto ezifana neToyota C-HR, Mazda CX-3, Opel Mokka X nezinye.
Ibukeka kahle, inobuchwepheshe futhi ihamba kamnandi nokungenza ngingakuboni okungayivimba ukuthi iwushubise umbango. Amanani Kona 1.0 T-GDI Executive Manual
– R379 900 Kona 2.0 NU Executive Automatic
– R399 900
Iphuma newarranty yeminyaka eyisikhombisa noma u-200 000km, service plan yeminyaka emihlanu noma u- 90 000km neroadside assistance yeminyaka emihlanu noma u-150 000km.