Asikugweme ukuqinisela ngemoto engalungile
IYAKHULEKA intandane yamahazard, ithi isisu somhambi asingakanani singangenso yenyoni, ukuhamba kwaqunda ubhoko.
Sesizithola sesishaya amahazard khona lana emasangweni ekhaya lakho lodumo, lokuwela umfula ugcwele. Sithi sicela ukuthi gozololo lapho kuphephe khona sivumele abasayothenga elabo ukuthi badlule ngokuphepha ngoba vele ukuphepha yinto yethu.
Awanamhlanje ama-hazard siwashaya simi eceleni komgwaqo owakhiwayo uDumisani Makhaye ngaseNew Germany, ePinetown, entshonalanga yeTheku.
Njengoba sishaya esidume ngazo asithandi kodwa siphoqwa yisimo, kwazise sesithe siyahamba sakhalakathela esiseleni esiyingozi saluma isondo lapatalala ekubeni bekuwukuphela kwalo. Akuphelanga mizuzu mingaki kwama enye imoto, kwaphinda kwama enye. Izimoto esezime eceleni komgwaqo ngesimo esifanayo sezizine, zonke zishaya ama-hazard. Ngenhlanhla yami nginabafowethu abahlala KwaDabeka naseWyebank bude buduze nale ndawo yesigameko. Njengoba sekuqala ukuhwalala ngibabize ngashesha ngoba nginovalo lokuthi ngingagcina ngigcwelezwa ngabantu.
Into engisukumisayo ukuze ngilobe kule ngosi wukuthi bengingenalo isondo eliyisipele kepha ukuthi ngikuveze ukuthi ziyenzeka lezi zinto zokuthi uhambe ngemoto oyazi kahle ukuthi ayiphelele.
Kusize khona ukuthi abafowethu banabantu ababaziyo bangibolekela isondo, ngalifaka ngashaya utshani.
Emva kwalesi sehlo ngifikelwe umqondo othi kakade bengisukwe yini ngihamba ngemoto engenalo isondo eliyisipele kodwa ngiziduduzile ngathi ziyenzeka lezi zinto emgwaqweni. Engani nazi izimoto zakwaBMW seziphuma zingenaso isipele ngakho akuselona ichilo nobuwula ukuthi imoto isemgwaqweni kodwa isipele asikho.
Ngifikelwe nawumbono engisanda kuwubona ezinkundleni zezokuxhumana lapho umlisa ohamba ngengadlangadla yemoto eyetha uphethroli ngesigubhu emgwaqweni ophithizela izimoto.
Umuntu owayethwebula leya video uthi lokhu kungenxa yokubiza kukaphethroli.
Kunemibuzo evamise ukubuzwa abantu uma uxakekile emgwaqweni, uma uthi uphelelwe uphethroli babuza ukuthi alusebenzi yini uthi olukhombisa ukuthi inophethroli ongakanani ethangini.
Uma ipatalalelwe yisondo ungasiphethe isipele babuza ukuthi kungani ungenaso isipele. Uma beyifice ibila babuza ukuthi ubungawahloli ngani amanzi lapho usuka khona. Le mibuzo inesisindo futhi ihlaba kuzwele kuloyo osuke ebuzwa evele esenkingeni yokwentula usizo kodwa ayilekeleli ukuthi ixazulule inkinga esuke ibhekene nalowo mshayeli ngaleso sikhathi. Singama-hazard sithi asikuveze ukuthi kuyenzeka uphume nemoto ekhaya ingalungile kodwa ngokuphoqwa yizinkinga osuke uzazi wena ukuthi ubhekene nazo, uphoqe.
Abantu abangakaze baxakeka abajwayele ukuthi bakuqonde ukuthi kungani udlule amagaraji kaphethroli uze ucinyelwe yimoto bese uphenduka undingasithebeni.
Yebo, kuyenzeka kube wubudedengu bokuthi awunakanga noma ubuthi uzofaka endaweni ethize kanti uzodidwa yizibalo ungabe usafika khona. Ngakho-ke yisimo esifanayo nodaba lwesondo eliyisipele. Kuyenzeka uncenge ngaphandle kwaso ngoba unezizathu zakho mhlawumbe uya endaweni ecezile lapho izimoto zomphakathi zingahambi khona noma ngoba usuhlwelwe.
Umbono wethu uthi ziyenzeka lezi zinto kodwa akukhona ukuthi ubudedengu bomshayeli ngaso sonke isikhathi, kuyaba nezimo eziphoqayo.
Asikusho lokho ngoba nakhu sekuxakeke mina mlobi wale ngosi kodwa yinto eyaziwayo lena ngakho asehlise ukujajana sivele sisize noma seluleke emva kokusiza. Hhayi-ke sesingawavala lana ama-hazard ethu, naku kuhlwa siseceleni komgwaqo silibele ukulanda kanti usizo sesilutholile sesingaqhubeka nohambo kodwa siqaphele ukuthi izidingo zemoto singazishayi indiva noma siqinisele ngoba silinga izinkinga. Masishayele ngokucophelela nokubuswa yiyo yonke imithetho yezokushayela ebusa lelizwe ukuze sihlangane sisawuphonsa umbalane nangesonto elizayo kuyo le ngosi.
Kungenjalo asihlangane ekhasini lethu Igedlela lami with Sthembiso Shangase kuFacebook. Yimi owenu nali ikheli ngezansi: hazardiso@gmail.com