Umsindo kugwazwa umfundi esikoleni
SEKUQUBUKE umsindo eNquthu ngekhansela elingunogada kwesinye sezikole eziseBabanango elisolwa ngokungawunaki umsebenzi wokuqapha isikole.
Lokhu kulandela isigameko sokugwazwa komfundi waseKwasa High ku-ward 3 oyingxenye yaseBabanango kodwa engaphansi kweNquthu ngenxa yemiklamo yemingcele yeDemacation Board yango-2016.
Lesi sigameko sidonsele manzi ngomsele ikhansela lendawo uMnuz Mbekezeli Mkhwanazi we-IFP, i-ANC efuna athathelwe izinyathelo ngokukhohlwa umsebenzi wokugada isikole ngenxa yokuba ikhansela.
UMnuz Bulelesi Ntshangase we-ANC eNquthu uhole ithimba lakhe ngoLwesihlanu bavakashela kulesi sikole beyohlola isimo.
“SiwuKhongolose siyakhala kakhulu ngendaba yaleli khansela ngoba alisalubhadi esikoleni kodwa lilibala ukugxila ebukhanseleni.
Kulezi zinsuku kugwazwe umfundi walimala kabi. Lokhu kwenzeke engekho uMkhwanazi njengonogada wesikole. Sifuna incazelo ngale nto yakhe ngoba asizukuvuma ukuba izingane nothisha basale bengagadiwe ngenxa yomuntu owenza imisebenzi emibili eyedwa,” kusho uNtshangase.
UMkhwanazi eziphendulela uthe badlala umsangano laba abakhonondayo ngoba akuyena yedwa oyikhansela eNquthu futhi enomunye umsebenzi kodwa baningi.
“Bayangijwayela laba. Okokuqala uNtshangase usuka le eNquthu uzohlupha la eBabanango. Uthe kuye uzishiye zifundiswa wubani izingane njengoba ebelapha esikoleni engigada kuso ngoba phela naye uyikhansela le-ANC eNquthu bese abuye abe nguthisha?
Mina ngaqala ukuvolontiya njengonogada kulesi sikole eminyakeni engu-13. Kuthe uma sekuqashwa nami ngafaka isicelo ngawuthola umsebenzi futhi ngangingakabi nayikhansela,” kusho uMkhwanazi.
Uthe umfundi ugwazwe ntambama sesiphumile isikole naye eseshayisile.
Uqhube wathi lo mfundi wayelwe momunye umngani ongafundi beziphuzele ngaphandle, wamkhipha izinyo.
Uthe lowo mngani ubuyile esezoziphindisela wagwaza lo mfundi.
Uthe uwenza kahle umsebenzi wokugada nowokuba ikhansela akaphazamiseki ndawo.
UMkhwanazi uthe inkinga i-ANC ifuna i-ward yakhe ephethwe i-IFP kodwa abasoze bayithole.
Okhulumela uMnyango wezeMfundo, uMnuz Muzi Mahlambi uthe bazothumela iziphathimandla zezemfundo ukuba ziyocubungula lolu daba.
NgokoMnyango wezokuBusa nokuBambisana neziNdaba zoMdabu, amakhansela akomasipala abasemakhaya avumelekile ukwenza eminye imisebenzi ngoba umsebenzi wobukhansela abawenzi ngokugcwele.
Lokhu useke wakuchaza uNgqongqoshe uNkk Nomsa Dube-Ncube ngaphambi kokhetho lwango-2016, wathi omasipala abakhulu basemadolobheni nakumaMetropolitan abafuni umuntu esule komunye umsebenzi.