Bazobanjwa maduze ababulali: Cele
UNGQONGQOSHE wamaPhoyisa uMnuz Bheki Cele usethembise ukuthi bazotholakala kungekudala ababulale isikhulu sikamasipala waseMvoti esidutshulwe sabulawa ngentululwane yezinhlamvu ehhovisi laso.
UCele ubehambele umndeni kaMnuz Thobani Ndaba obebambe kwesokuba ngumqondisi wophiko lwakwaCommunity Services kuMasipala waseMvoti okuthiwa uhlaselwe wabulawa esehhovisi lakhe eliseGreytown ngoLwesine olwedlule.
Ngokusho kukaCele, uNdaba udutshulwe ngesibhamu sohlobo lwe-AK 47 amahlandla alinganiselwa kwangu-20.
Utshele umndeni ukuthi usekhulumile nophiko olujutshwe ukuthi luphenye ngokubulawa kukaNdaba ngoba efuna ukwazi ukuthi seluhambe kangakanani nophenyo.
“Namuhla (esho izolo) ngiyile eGreytown ukuthola umbiko oshoyo ukuthi amaphoyisa asehambe afikaphi (nophenyo). Ngingasho ukuthi ngigculisekile ngombiko wawo. Akusekude ukuthi sazi ukuthi kwenzekeni,” kusho uCele.
Uveze nokuthi uhambele la okubulawe khona uNdaba lapho athe ufike wakholwa ukuthi umuntu ombulele ubemfuna efile ngempela.
UCele uthe amahhovisi obekusebenzela kuwo uNdaba awakude nesiteshi samaphoyisa. Uthe umuntu ombulele akabanga nandaba nalokhu wasebenzisa isibhamu i-AK 47 nokuyisibhamu athe sinomsindo omkhulu. UCele uthe bebazi kahle ukuthi amaphoyisa azosizwa isibhamu siqhuma kodwa baqhubeka bazombulala.
Uzwakalise ukukhathazeka ngezigameko zokubulawa kwabantu ezigcina zibuyele KwaZulu-Natal njengoba ethe sekukaningi kubulawa abantu bese kutholakala ukuthi abantu abababulele abakulesi sifundazwe.
Wenze isibonelo ngabantu ababulale ummeli waseCape Town, uMnuz Pete Mihalik osekuboshwe abasolwa ababili ngokufa kwabo – bobabili okuvele ukuthi abakulesi sifundazwe.
Kuqhume isililo ngesikhathi uCele efika njengoba umndeni bewusazama ukwamukela isigameko esenzekile.
UMnuz Bongani Ndaba ongumfowabo uthe balahlekelwe ngokufa kukamfowabo.
Umchaze njengomuntu obezinikele emsebenzini wakhe.
Uthe kubuhlungu ukuthi ababulali bancishe umfowabo ilungelo lakhe lokuphila kodwa bona noma bangaboshwa bayobe besenalo elabo ilungelo lokuphila.